जळगाव - शहरासह जिल्ह्यातील तापमान दिवसेंदिवस वाढतच असून मंगळवारी (ता. १८) येथे तापमान ४५ अंश सेल्सिअसपर्यंत पोहोचले. एरवी मे महिन्यात जिल्ह्याचा तापमानाचा पारा ४५ अंशापर्यंत जातो; यंदा तो एप्रिल महिन्यातच गेला आहे.

उन्हाची तीव्रता पाहता नागरिकांनी दुपारी बारा ते सायंकाळी पाचपर्यंत घराबाहेर न पडण्याचे आवाहन जिल्हा प्रशासनाने केले आहे. ममुराबाद येथील हवामान केंद्रावर मंगळवारी तापमानाची नोंद ४२.४ अंश एवढी झाली आहे, तर भुसावळ येथील हवामान अभ्यासक, वेलनेस वेदरचे संचालक नीलेश गोरे यांच्याकडे तापमानाची नोंद ४५ अंश नोंदली गेली. कडक उन्हामुळे नागरिक डोक्याला रुमाल, टोपी घालूनच बाहेर पडत आहेत.

जळगावमधील तालुकानिहाय तापमान असे

जळगाव- ४५ अंश सेल्सिअस, भुसावळ- ४५, अमळनेर- ४४, बोदवड- ४३, भडगाव- ४४, चोपडा- ४३, चाळीसगाव- ४२, धरणगाव- ४३, एरंडोल- ४४, फैजपूर- ४४, जामनेर- ४५, मुक्ताईनगर- ४४, पारोळा- ४३, पाचोरा- ४४, रावेर- ४४, वरणगाव- ४५, यावल- ४३ अंश सेल्सिअस.