जळगाव: नाशिक मध्यवर्ती कारागृहात खुनाच्या गुन्ह्यात जन्मठेपेची शिक्षा भोगत असलेल्या महिला कैदी रजेवर सुटल्यानंतर फरार झाली होती. भडगाव पोलिसांत याप्रकरणी गुन्हाही दाखल केला होता. गुन्हे शाखेच्या पथकाने गुप्त माहितीच्या आधारे निर्मलाबाई अशोक पवार (रा. टोणगाव, ता. भडगाव) यांना अटक करुन न्यायालयात हजर केले.

कोरोना महामारीच्या काळात गृहमंत्रालयाच्या निर्देशानुसार राज्यभर आणि देशभर शिक्षा भोगत असलेल्या कैद्यांना कोविड अभिवचन रजेवर सोडण्यात आले होते. याच वेळी भडगाव येथील रहिवासी तथा खुनाच्या गुन्ह्यात जन्मठेपेची शिक्षा भोगत असलेल्या निर्मलाबाई अशोक पवार (वय ५१) यांनाही नाशिक कारागृहातून अभिवचन रजेवर सोडण्यात आले होते.

ठरल्याप्रमाणे, निर्मलाबाई यांनी ५ जून २०२२ पर्यंत कारागृहात पोहचणे आवश्यक असताना त्या वेळेत पोहचल्या नाही. तसेच दिलेल्या पत्यावरुन गायब असल्याने त्यांच्याविरुद्ध भडगाव पोलिसांत गुन्हा दाखल करण्यात आला होता.

न्यायालयाच्या सूचनेवरून संशयित महिलेचा शोध सुरु असताना ती, भडगाव येथे परतली असून पत्ता बदलून वास्तव्यास असल्याची गुप्त माहिती गुन्हे शाखेचे निरीक्षक किरणकुमार बकाले यांना मिळाली होती. त्यांच्या पथकातील महिला कर्मचारी रत्ना मराठे, रुपाली खरे, राजेंद्र पवार अशांसह पथकाला रवाना केल्यावर निर्मलाबाई पवार या टोणगाव (ता. भडगाव) येथे आल्या असताना पथकाने त्यांना ताब्यात घेतले. न्यायालयात हजर केल्यावर निर्मलाबाईची कारागृहात रवानगी करण्यात आली आहे. खुनाच्या गुन्ह्यात जन्मठेप अटकेतील निर्मलाबाई पवार (वय ५१) यांना दहा वर्षांपूर्वी (वर्ष २०११) मालेगाव तालुका पोलिस ठाण्याच्या हद्दीत झालेल्या खुनाच्या गुन्ह्यात जिल्‍हा न्यायालयाने (१९ डिसेंबर २०१३) जन्मठेपेची शिक्षा ठोठावली असून तेव्हापासून त्या नाशिक मध्यवर्ती कारागृहात शिक्षा भोगत होत्या. पॅरोल रजेवर सुटल्यानंतर वेळेत परतणे अपेक्षीत असताना फरार झाल्याने त्यांच्याविरुद्ध गुन्हा दाखल झाला आहे.