Manoj Jarange Patil : आरक्षणाच्या मागणीसाठी मराठा समाजाने एल्गार पुकारला असून त्या पार्श्‍वभूमीवर रविवारी (ता.३) मनोज जरांगे-पाटील यांची सभा जळगावमध्ये होईल.

सभेच्या निमित्ताने समाजातील बंधू-भगिनींची मोटारसायकल रॅली शनिवारी (ता.२) सकाळी दहाला काढण्यात येईल. (Manoj Jarange Patil meeting in Jalgaon on Sunday jalgaon news)

काव्यरत्नावली चौकातून रॅली सुरू होऊन आकाशवाणी चौक, बहिणाबाई उद्यान, रिंगरोड-गोकूळ स्वीट, कोर्ट चौक-नेहरू पुतळा-टॉवर चौक-भिलपुरा-रथचौक-नेरीनाका-पांडे डेअरी चौक, स्वातंत्र्य चौक, बसस्थानक मार्गे शिवतीर्थावर रॅली येईल. त्याठिकाणी शिवाजी महाराजांच्या पुतळ्यास माल्यार्पण करून रॅलीचा समारोप होईल.

सभेच्या तयारीसाठी सकल मराठा समाजाच्या बैठकी गेल्या काही दिवसांपासून सुरू आहेत. त्याचाच एक भाग म्हणून गुरुवारी (ता. ३०) सायंकाळी पद्मालय विश्रामगृहात समाजाची बैठक झाली.

बैठकीला सुरेंद्र पाटील, प्रतिभा शिंदे, प्रमोद पाटील, गोपाल दर्जी, रवी देशमुख, माजी महापौर किशोर पाटील, सुरेश पाटील, संतोष पाटील, राजेंद्र देशमुख, राम पवार, दीपक चव्हाण, कुलभूषण पाटील आदी उपस्थित होते. बैठकीनंतर पत्रकार परिषदेत श्री. जरांगे-पाटील यांची सभा आणि मोटारसायकल रॅलीची माहिती देण्यात आली.

जरांगेंचा सत्कार

बालगंधर्व खुले नाट्यगृहात रविवारी सायंकाळी सातला मनोज जरांगे-पाटील यांचा सत्कार आणि सभा होईल. त्याआधी साडेसहाला श्री. जरांगे-पाटील यांचे जळगावमध्ये आगमन झाल्यानंतर खोटेनगर, शिवकॉलनी, आकाशवाणी चौकात स्वागत करण्यात येईल. शिवतीर्थावर अभिवादन करून ते सभास्थळी येतील.