मेहुणबारे (जळगाव) : गिरणा धरणाच्या पाणलोट क्षेत्रात रात्री मुसळधार पाऊस झाल्याने धरणात पाण्याची मोठी आवक सुरु आहे. यामुळे गिरणा नदीत पाणी सोडण्यात आल्याने नदीकाठालगत असलेल्या गावांना प्रशासनाकडून सतर्कतेचा इशारा देण्यात आला आहे.

गिरणा धरणातून आज सकाळी (ता. २०) ८.४० वाजता गिरणा धरणाचा प्रवाह ६६ हजार ८५३.६२ क्युसेसवरुन ७४ हजार २८२ व मन्याड धरणातून ७ हजार ५०० असा तब्बल ८१ हजार ७८२ क्युसेसने गिरणा पात्रात पाणी सुरु असल्याने गिरणा नदीला पुर आला आहे. गिरणा धरणाच्या पाणलोट क्षेत्रात मुसळधार पाऊस झाल्याने धरणात पाण्याची मोठ्या प्रमाणावर आवक झाली आहे. गिरणा धरणातून ७४ हजार २८२ व मन्याड धरणातून ७ हजार ५०० असा पाण्याचा विसर्ग गिरणा पात्रात सुरु असल्याची माहिती गिरणा पाटबंधारे विभागाचे कार्यकारी अभियंता धर्मेंद्रकुमार बेहरे यांनी सकाळशी बोलतांना सांगितले. 

नदीकाठच्‍या गावांना इशारा
गिरणा काठावरील गावांना सतर्कतेचा इशारा देखील देण्यात आला आहे.गिरणा नदीपात्रात पाण्याची वाढ होत आहे. नदी काठावरील गावातील नागरिकांनी सावधानता बाळगावी. नदी पात्रात कोणीही जावू नये, असेही आवाहन गिरणा पाटबंधारे विभागच्या सुत्रांनी केले आहे.

संपादन ः राजेश सोनवणे