जळगावः जळगाव जिल्हा बँक संचालक निवडणूकीत (Jalgaon District Bank Election) उमेदवारी अर्जांची पडताळणी तसेच हरकत आलेल्या अर्जावर सुनावणी बुधवारी झाल्या. त्यात जामनेर तालुक्यातील विविध कार्यकारी सेवा संस्था मतदारसंघातून भाजपचे नेते आमदार गिरीश महाजन (MLA Girish Mahajan), अलका पाटील यांचे अर्ज वैध ठरविले असल्याची माहिती समोर येत आहे. तर जिल्हा परिषद सदस्या माधुरी चंद्रशेखर अत्तरदे यांच्याकडे सहीसाठी उपनिबंधकांनी ५० हजार रूपयांची मागणी केल्याचा धक्कादायक आरोप केला आहे. तर अन्य चार उमेदवारांचे अर्ज बाद केल्याने त्यांनी देखील ठिय्या आंदोलन सुरू केले आहे.

जळगाव जिल्हा बँक संचालक निवडणूकीची अर्ज पडताळणी व त्यावर आलेल्या हरकतीवर सुनावणी बुधवारी घेण्यात आल्या. यात अनेक दिग्गज नेत्यांच्या अर्जावर हरकती आल्यानंतर आज निवडणूक निर्णय अधिकारी निर्णय देणार आहे. त्यात आमदार गिरीश महाजन, अलका पाटील यांचे अर्ज वैध ठरविले आहे. तर जळगाव जिल्हा परिषदेचे सदस्या माधुरी चंद्रशेखर अत्तरदे यांचा अर्ज बाद ठरविल्याने निवडणूक अधिकारी यांनी अर्ज वैध करण्यासाठी पन्नास हजाराची लाच मागितल्याचा आरोप केल्याने खळबळ उडून दिली.

बँकेतच ठिय्या आंदोलन

जळगाव जिल्हा मध्यवर्ती सहकारी बँकेच्या निवडणूक प्रक्रियेत मुद्दाम डावलण्यात येत असल्याच्या आरोपावरून जिल्हा परिषद सदस्या माधुरी अत्तरदे यांनी ठिय्या आंदोलन सुरू केले. हे आंदोलन सुरू झाल्यानंतर मुक्ताईनगर सोसायटी मतदारसंघातून अर्ज बाद करण्यात आलेले नाना पाटील यांनी कर्ज घेतले नसतांना देखील कर्जदार दाखवून आपल्याला बाद केल्याचा आरोप करत आंदोलन सुरू केले. तर माजी आमदार स्मिता वाघ यांनीही गैरव्यवहाराचा आरोप केला. यासोबत भालोद येथील भारती नारायण चौधरी यांच्यातर्फे त्यांचे पती नारायण शशिकांत चौधरी यांनीही ठिय्या आंदोलनाच सहभाग घेतला आहे.