जळगाव ः येथील महापालिकेने एस. के. कंत्राटदाराला सफाई ठेका देताना अनियमितता केली आहे. या ठेक्यात चक्क काही नगरसेवकांच्या नातेवाइकांची नावे मजूर म्हणून दाखिले आहे. त्यामुळे या ठेक्यात १ कोटी २० लाखांचा गैरव्यवहार झाला आहे, असा गंभीर आरोप महापालिकेतील विरोधी पक्षाचे गटनेते सुनील महाजन आज पत्रकार केला.

सफाई ठेका घोटाळा बाबत माहिती देण्याबाबत शिवसेनेने पत्रकार परिषद आज घेतली. यावेळी  शिवसेनेचे महानगरप्रमुख शरद तायडे, नगरसेवक विष्णू भंगाळे, नगरसेवक नितीन बर्डे यावेळी उपस्थित होते. पुढे बोलतांना महाजन म्हणाले, की महापालिकेत ६ मार्चपासून एस.के.कंत्राटदाराला शहरात सफाईचा ठेका दिला गेला. या कंत्राटदाराला आतापर्यत २ कोटी ४० लाख अदा केले. त्यात १ कोटी २० लाखांचा गैरव्यवहार आहे. या ठेक्यात सत्ताधाऱ्याची भागीदारी आहे. वॉटरग्रेस कंपनीला ज्या नियम अटींवर ठेका दिला होता त्या अटी एस.के.कंत्राटदाराला का लावल्या नाहीत. या कंत्राटदाराने आपल्या मजुरांचे अकौंट बँकेत काढलेले नाही. वाटरग्रेसला ५ वर्षासाठी ७५ कोटी देणार होते, एस.के.कंत्राटदाराला ८५ कोटी देताहेत. १० कोटींचा अपव्यय महापालिका करीत आहे. 
 
कर्मचाऱ्यांची फसवणूक 
एवढा मोठा ठेका विना निविदा दिला गेला आहे. या ठेक्याची निविदा काढायला हवी होती. मात्र तसे झालेले नाही. अधिकाऱ्यांचेही यात संगनमत आहे. महापालिका ठेकेदाराला एका मजुराचे वेतन दरमहा १६ हजार रुपये देते. ठेकेदार मात्र ७५०० रुपये कामगाराला देतो.यावरून कामगारांची पिळवणूक होते आहे हे सिद्ध होते. हा ठेका देताना प्रत्येक नगरसेवकाला वीस हजार रुपये दिले जातील असे सांगितले होते. मात्र आजपर्यंत एकाही नगरसेवकाला ही रक्कम मिळाली नाही. 

नगरसेवकांचे नातेवाईक मजूर 
एस.के.कंत्राटदाराच्या ठेक्यात काही नगरसेवकांच्या नातेवाइकांची नावे मजूर म्हणून आहे. आठ ते दहा नावे मी स्वतः पाहिलेली आहेत. 
महापालिकेतील या गैरव्यवहाराबाबत लवकरच शहर पोलिस ठाण्यात तक्रार देण्यात येईल. पालकमंत्री गुलाबराव पाटील यांच्या नेतृत्वाखाली नगरविकास मंत्री एकनाथ शिंदे यांना भेटून गैरव्यवहाराची माहिती दिली जाईल.