न्हावी (ता. यावल) : विद्यार्थ्यांचे शैक्षणिक नुकसान टाळण्यासाठी सरकारने अभ्यासक्रमाचे ऑनलाइन वर्ग घेण्यास सुरवात केली खरी, परंतु ग्रामीण भागात विद्यार्थ्यांकडे ऑनलाइन शिक्षण घेण्यासाठी साधन सामग्री आहे का? हा देखील मोठा प्रश्न आहे. ना अँड्रॉइड फोनची उपलब्धता, ना नेटवर्क अशा अनेक अडचणींचा सामना ग्रामीण भागात करावा लागत आहे. 

कोरोनामुळे मार्चपासून शिक्षण संस्था बंद आहेत. त्यामुळे शैक्षणिक वर्षाचे वेळापत्रक कोलमडले आहे. अनेक परीक्षा पुढे ढकलल्या. परिणामी, विद्यार्थ्यांचा अभ्यासही थांबला? अशावेळी विद्यार्थ्यांचे शैक्षणिक नुकसान होऊ नये, यासाठी ऑनलाइन अभ्यासक्रम सुरू करण्यात आला. अनेक खासगी संस्थांनी व्हॉट्सअप ग्रुप, यू-ट्यूबच्या माध्यमातून ऑनलाइन क्लासेस सुरू केले आहेत. 

इंटरनेटच नाही तर शिक्षण कसले
राज्य सरकारने ऑनलाइन शिक्षण पद्धती सुरू करणार असल्याचे सांगितले जात असले तरी आज रोजी माहिती तंत्रज्ञानाचा वापर ग्रामीण भागातील विद्यार्थ्यांना करता येणे गरजेचे असून, यासाठी स्मार्टफोन, लॅपटॉप, इंटरनेट आधी गोष्टी देखील त्यांच्याकडे उपलब्ध असणे गरजेचे आहे. आजही ग्रामीण भाग काही ठिकाणी इंटरनेटची सुविधा लाभापासून वंचित आहे. अनेक विद्यार्थी यापासून वंचित राहतील, यात शंका नाही? पण यातून निर्माण होणाऱ्या परिणामांचे काय? यामुळे मुलांचे डोळे आणि मेंदू आजारी होत आहे. ऑनलाइन शिक्षण हे आजच्या काळाची गरज आहे. 

ऑनलाइन शिक्षणामुळे आज तरी पालक व विद्यार्थी गोंधळात दिसून येत आहे. मुलांचे शैक्षणिक नुकसान होऊ नये म्हणून ऑनलाइन शिक्षण देण्याचा पर्याय सुरू झालेला आहे. शैक्षणिक संस्थांनीही शिक्षकांच्या माध्यमातून सुरवात करीत आहे. अडचणी जरूर आहे, पण हे डिजिटल इंडियाकडे जाण्यासाठी महत्त्वाचे पाऊल ठरेल. 
- पी. एच. महाजन, शिक्षण प्रसारक मंडळ, न्हावी 

नवीन तंत्रज्ञानामुळे निर्माण झालेल्या अपरिहार्यतेत शिक्षकांना शिक्षक राहून चालणार नाही तर विद्यार्थी व्हावे लागेल. परिस्थितीमुळे ही अपरिहार्यता स्वागतार्ह आणि स्वीकारार्ह आहे आणि आपण तिचा स्वीकार केला पाहिजे. 
- तिलोत्तमा चौधरी, मुख्याध्यापक, शिक्षण प्रसारक मंडळ, न्हावी 

संपादन ः राजेश सोनवणे