जळगाव  : शहरात खासगी क्वारंटाइन सेंटरपाठोपाठ खासगी कोविड रुग्णालयांना जिल्हा प्रशासनाने मंजुरी दिली. यामुळे आर्थिक स्थिती चांगली असलेले रुग्ण खासगी क्वारंटाइन सेंटर, कोविड रुग्णालयांचा आधार घेऊ लागले आहेत. परिणामी, जिल्हा प्रशासकीय यंत्रणेवरील कोरोना संशयित रुग्णांचा ताण कमी होण्यास मदत झाली आहे. 
जिल्ह्यात आतापर्यंत पॉझिटिव्ह रुग्णांची संख्या दहा हजारांवर गेली आहे, तर सहा हजार ७३६ रुग्ण कोरोनामुक्त झाले आहेत.

शहरात महापालिकेने तीन खासगी क्वारंटाइन सेंटरला परवानगी दिली. महापालिकेचेही क्वारंटाइन सेंटर आहेत. महापालिकेने आयटीआय, शासकीय तंत्रनिकेतन, अभियांत्रिकी महाविद्यालय क्वारंटाइन सेंटर अधिग्रहित केली आहेत. शहरात दिवसेंदिवस वाढणारी संशयित रुग्णांची संख्या पाहता महापालिकेने जिल्हाधिकाऱ्यांच्या परवानगीने पेड बेसीसवर खासगी क्वारंटाइन सेंटरला परवानगी दिली. त्यात जैन समाजातर्फे जितो क्वारंटाइन सेंटर, महेश प्रगती मंडळ, दीपक परदेशी यांच्या संभाजीराजे नाट्यगृहात क्वारंटाइन सेंटर सुरू आहे. 

संभाजीराजे नाट्यगृहात ५० खाटा आहेत. तूर्त त्यात दहा रुग्ण उपचार घेत आहेत. दोन बरे होऊन घरी गेले. जितो क्वारंटाइन सेंटरची मुदत ३० जुलैला पूर्ण होत असल्याने त्या क्वारंटाइन सेंटरमध्ये आता एकही क्वारंटाइन नाही. महेश प्रगती मंडळात २२ रुग्ण क्वारंटाइन आहेत. जितो क्वारंटाइन सेंटर बंद होणार असल्याने आता महेश प्रगती मंडळ, संभाजीराजे नाट्यगृहातील क्वारंटाइन सेंटरमध्ये गर्दी वाढणार आहे. 
राज्य शासनाने जिल्ह्यात १२ खासगी कोविड सेंटरला परवानगी दिली आहे. आर्थिक स्थिती चांगली असलेले बाधित रुग्ण खासगी रुग्णालयात उपचार घेतील. त्यामुळे शासकीय क्वारंटाइन सेंटर व कोविड सेंटरवरील ताण कमी होण्यास मदत होत आहे. 

दृष्टिक्षेपात जिल्हा... 
*एकूण पॉझिटिव्ह रुग्ण- दहा हजार २४९ 
* कोरोनामुक्त झालेले- सहा हजार ७३६ 
* उपचार सुरू असलेले- पाच हजार तीन 
* शहरात उपचार घेतलेले- ७७९ 
 

संपादन- भूषण श्रीखंडे