जळगाव : महसूल कर्मचाऱ्यांच्या प्रलंबित मागण्यांबाबत महसूल मंत्री बाळासाहेब थोरात यांच्या सूचनेप्रमाणे आज नाशिक विभागीय महसूल आयुक्तांशी कर्मचारी संघटनेच्या पदाधिकाऱ्यांसोबत चर्चा झाली. मात्र मागण्या मान्य करणार असेल तर चर्चा करू, आमच्या मागण्या पूर्ण कराव्यात. जोपर्यंत मागण्या मान्य होत नाही तोपर्यंत संप सुरूच राहील असा पवित्रा कर्मचाऱ्यांनी घेतला आहे.

अशा आहेत मागण्या

बराच कालावधी होऊनही त्याबाबत शासनाकडून कोणताही निर्णय घेण्यात आलेला नाही. यामुळे महसूल कर्मचाऱ्यांकडून सोमवारपासून (ता.४) निदर्शने व घोषणाबाजी करीत बेमुदत बंद आंदोलन सुरू केले आहे. काल (बुधवारी) महसूलमंत्री थोरात यांनी राज्यातील महसूल कर्मचाऱ्यांच्या मागण्यांबाबत मंत्रालयात आढावा घेतला. गुरुवारी (ता. ७) सर्व विभागीय आयुक्तांना आंदोलकांच्या मागण्यांबाबत चर्चा करून अहवाल देण्यास सांगितला होता.त्यानुसार विभागीय आयुक्तांशी चर्चा झाली. त्यात बोलणी फिस्कटली. यामुळे संप सुरूच ठेवण्यात येणार असल्याचे महसूल कर्मचाऱ्यांनी सांगितले.आंदोलनात महसूल विभागातील लिपिक, अव्वल कारकून, शिपाई संवर्गातील कर्मचारी सहभागी झाल्याने शासकीय कार्यालयात शुकशुकाट पसरला आहे.

सर्वच शासकीय कामे ठप्प झाल्याने नागरिकांच्या फेऱ्या वाया जात आहेत. जळगाव जिल्हा महसूल कर्मचारी संघटना, जिल्हा चतुर्थ श्रेणी महसूल कर्मचारी संघटना, जिल्हा महसूल वाहनचालक संघटना, जिल्हा महसूल कर्मचारी संघटनेचे सर्व सदस्य, पदाधिकाऱ्यांनी आंदोलनात सहभाग घेतला आहे. मे २०२१ अन्वये राज्यस्तरीय केलेला नायब तहसीलदार संवर्ग रद्द करावा. अव्वल कारकून संवर्गातून नायब तहसीलदार पदोन्नतीची प्रक्रिया तत्काळ पूर्ण करावी, महसूल साहाय्यक (लिपिक) रिक्त पदांसाठी तत्काळ भरती प्रक्रिया राबवावी, अव्वल कारकून (वर्ग ३)च्या वेतन श्रेणीतील त्रुटी दूर करणे, शिपाई संवर्गातून तलाठी संवर्गात पदोन्नती देणे आदी मागण्यांसाठी आंदोलन करण्यात आले. जिल्हा महसूल कर्मचारी संघटनेचे जिल्हाध्यक्ष शैलेश परदेशी, कार्याध्यक्ष योगेश नन्नवरे, भाऊसाहेब नेटके, प्रवीण भिरूड, अतुल जोशी आदींनी संपात सहभाग घेतला आहे.