जळगाव : बोदवड तहसीलदारांनी पकडलेल्या डंपरची अदलाबदल असो, की धरणगाव तहसीलदारांनी भरलेले ट्रॅक्टर खाली करून कागदावर दाखवणे असो, तहसील कार्यालयातील एक अनुभवी रावसाहेब आणि बदली होऊनही ठाण मांडून बसलेला एक कर्मचारी अशा दोघांनी वाळूमाफियांसाठी जळगाव तहसीलमध्ये ‘जादूगरी’ चालविली आहे.

कुठलाही अवैध धंदा असो, त्याला तल्लख बुद्धीसह धारिष्ट्य लागतेच लागते. ‘रईस’ या शाहरुख खान अभिनित चित्रपटात दारूबंदी असलेल्या गुजरातमध्ये दारूचा अवैध धंदा चालविण्यासाठी लहान वयातच चित्रपटाचा नट असलेला रईस याच्यावर ‘बनिये का दिमाग और मियाँभाई की डेअरिंग’ असा संवाद खूप प्रसिद्ध झाला. अगदी तशीच गत जळगाव तहसील कार्यालयाची आहे. सहजासहजी जो कोणीच करू शकत नाही असे धारिष्ट्य (डेअरिंग) तहसील कार्यालयातील जादुगरांकडे आली आहे. त्यात एक निष्णात तरुणाला निवृत्तीला आलेल्या रावसाहेबांची जोड मिळाली आहे.

कर्मचारीच माफियांचे मित्र

जळगाव तहसीलमध्ये तसे तर बहुतेक कर्मचारी वाळूवाल्यांचे मित्र, जोडीदार आहेत. मात्र, शासकीय कामाची जबाबदारी कंत्राटी कामगारावर सोपवून पूर्णवेळ फक्त वाळू रगडून तेल काढण्याचे काम फक्त दोघांची जोडीच करू शकते. परजिल्ह्यातील या तरुण कर्मचाऱ्याची जळगाव तहसीलमधून बदली झालेली आहे. मात्र, त्याच्यावर जबाबदारी मोठी असल्याने साहेबही त्याला बदलीच्या ठिकाणी जाऊ देत नाही. तर, दुसरे अनुभवी महाशयांवर ॲन्टिकरप्शनचा ट्रॅप होऊन त्यातून सहीसलामत बाहेर निघाल्यानंतर भुसावळ आणि आता जळगावची धुरा त्यांनी सांभाळली आहे. जिल्ह्याचे राजकारण, नेते, वरिष्ठ अधिकाऱ्यांबाबत असलेली जाण, तसेच जुन्या ओळख- परिचयातून पोलिस, पक्ष पदाधिकारी सहकाऱ्यांसोबत रात्रीच्या बैठका यामुळे येणारे कुठलेली संकट असो, त्यावर लिलया मात करण्याचे कसब या रावसाहेबांना आहे. यातून तहसीलच्या संपूर्ण ‘कलेक्शन’ची जबाबदारीच या दोघांच्या खांद्यावर सोपविली गेली आहे.

बहुतांश प्रकरणात तर तहसीलदार असलेल्या अधिकाऱ्याच्या कानालाही वारा लागत नाही अन्‌ परस्पर ‘समरी पावर’च्या परवानग्या देऊन महिन्याकाठी लाखोंची माया जमा केली जात असल्याचे तहसीलच्याच एका कर्मचाऱ्याने गुप्त माहिती दिली आहे.'जादूगारांवर कारवाईचे ढग दाटले

बोदवड तहसील प्रकरणात सीसीटीव्ही फुटेजमधून हा जादूगार गायब झाला असून, भरलेल्या ट्रॉलीचे वाळू ट्रॅक्टर पकडणाऱ्या धरणगाव तहसील कार्यालयातही सेंधमारी झाली आहे. भरलेले वाळू ट्रॅक्टर बघणाऱ्या प्रत्यक्षदर्शींना खोटं ठरवून आता तीन ट्रॉल्या खालीच असल्याचे शासकीय चौकशीत सांगितले गेले आहे. ही सर्व जादुगरी त्याच महाशयांनी घडवून आणल्याचा संशय बळवला असून, जिल्हाधिकाऱ्यांनी कठोर कारवाईचे संकेत दिल्यानंतर संबंधितांचे धाबे दणाणले आहे.