जळगाव : शहरातील मासुमवाडी परिसरात चोरीच्या (Theft) उद्देशाने फिरणाऱ्या एका संशयितास ताब्यात घेण्यात आले आहे. संजीव ग्यानप्रसाद सागर (वय ३३, रा. महालक्ष्मी दालमिल, एमआयडीसी) असे नाव असून त्याला एमआयडीसी पोलिसांनी ताब्यात घेतले आहे. (Suspicious thief Arrested at Jalgaon Crime News)

शहरातील एमआयडीसी पोलिस ठाण्याच्या हद्दीत सहाय्यक फौजदार अतुल वंजारी, योगेश सपकाळे, सुनील सोनार, किरण पाटील, सचिन पाटील, राजश्री बाविस्कर सोमवारी (ता. २३) रात्रीच्या सुमारास कॉम्बिंग ऑपरेशन राबवत होते. यावेळी आठवडे बाजारात संजीव सागर हा आपली ओळख लपवून पोलिसांना पाहत पळून गेला होता. पोलिस पथकाने त्याचा पाठलाग करुन पकडले असता, तो रेकॉर्डवरील सराईत चोरटा असल्याचे लक्षात आले. पोलिसांनी त्याला पोलिस ठाण्यात आणून त्याच्याविरुद्ध गुन्हा दाखल करण्यात आला आहे.