पारोळा : बोळे (ता. पारोळा) येथील शेतकऱ्याने आपल्या शेतात पाइपलाइनसाठी पत्नीचे दागिने गहाण ठेवून व हात उसनवारी आणलेले पावणेदोन लाखावर अज्ञात चोरट्याने डल्ला मारत रक्कम लंपास केल्याची घटना घडली आहे.

बोळे येथील दरबारसिंग झगेसिंग गिरासे यांनी शेतामध्ये पाइपलाइन करायची होती, त्यासाठी त्यांनी आपल्या सहकाऱ्यांकडून एक लाख रुपये रोख उसनवार घेतले होते व आपल्या पत्नीचे दागिने गहाण ठेवून सत्तर हजार रुपये मिळाले होते. सदर रक्कम त्यांनी आपल्या घरातील गोदरेज कपाटामध्ये ठेवली होती. (Thieves seized usanwar money bought for agriculture pipeline Jalgaon Crime News)

हेही वाचा : असा वाढवा तुमचा ‘क्रेडिट स्कोअर’

१० रोजी ते नेहमीप्रमाणे आपल्या शेतात कामासाठी गेले असता दुपारी साडेबारा वाजेच्या सुमारास त्यांच्या पत्नी घराच्या बाहेर धुणे धुत असताना कोणीतरी अज्ञात चोरट्यांनी संधीचा फायदा घेत घरात घुसून व घरातील कपाटातील ठेवलेली एक लाख सत्तर हजार रुपये रक्कम लंपास करून पसार झाल्याची घटना घडली आहे.

भरदिवसा दुपारच्या सुमारास घरात लोक असताना देखील अशा प्रकारच्या चोरी होत असल्याने ग्रामीण भागातील लोकांमध्ये घबराटीचे वातावरण निर्माण झाले आहे. याबाबत त्यांनी दिलेल्या फिर्यादीवरून अज्ञात चोरट्याविरुद्ध पारोळा पोलिस ठाण्याला गुन्हा दाखल करण्यात आला आहे. हवालदार जयवंत पाटील तपास करीत आहेत.