दाभोळ (रत्नागिरी) : दापोली तालुक्‍यातील पांगारी तर्फे हवेली ग्रामपंचायतीच्या सरपंचपदी बिनविरोध विराजमान होण्याचा बहुमान वयाच्या 23 वर्षीच व इंजिनिअरिंगचे शिक्षण घेत मीनाक्षी गुरव यांना मिळाला असून उपसरपंचपदी शंकर मांजरेकर यांचीही निवड करण्यात आली आहे. 

पांगारीतर्फे हवेली या ग्रामपंचायतीची सार्वत्रिक निवडणूक बिनविरोध झाली होती. यात सदस्य म्हणून सुभाष सकपाळ, जनार्दन खापरे, सौ. दीपिका महाकाळ, गीतांजली लोंढे, सौ. सोनिया जाधव आदी निवडून आले. ही निवडणूक बिनविरोध करण्यासाठी मनोहर शिबे, सामाजिक कार्यकर्ते अकबर इनामदार, माजी सरपंच धोंडू नाचरे, माजी पंचायत समिती सदस्य सौ.अंजली भागणे, माजी सरपंच नजर बर्डे, तंटामुक्‍त गाव समितीचे अध्यक्ष विठोबा सकपाळ यांच्यासह ग्रामस्थांनी प्रयत्न केले होते. सरपंच मीनाक्षी गुरव म्हणाल्या, आपण इंजिनिअरिंग पदवीच्या शेवटच्या वर्षाचे शिक्षण लवेल येथील अभियांत्रिकी महाविद्यालयात घेत आहोत. 

हेही वाचा- त्यांचा राजीनामा घेण्याची हिंमत आणि धाडस मुख्यमंत्र्यामध्ये नाही ; निलेश राणेंची टीका -

राजकीय पार्श्‍वभूमी नसताना.. 
माझ्यासारख्या विद्यार्थिनीला कोणतीही राजकीय पार्श्‍वभूमी नसताना व आपण सर्वसामान्य कुटुंबातील असूनही ग्रामस्थांनी बिनविरोध सरपंचपदाचा बहुमान दिला आहे. त्याबद्दल मी ग्रामस्थांची आभारी आहे. गावाचा विकास करण्यासाठी आपण कटिबद्ध असून सर्वांच्या सहकार्यातून व सल्ल्याने आपण काम करणार आहोत, असेही मीनाक्षी गुरव यांनी स्पष्ट केले.  

संपादन- अर्चना बनगे