84787
-----------
मल्लखांब शिबिरात ३७ जणांचा सहभाग
सकाळ वृत्तसेवा
खेड, ता. २१ : डेरवण येथील एसव्हीजेसीटीच्या क्रीडा संकुलात आयोजित विभागीयस्तरीय मल्लखांब कौशल्य विकास प्रशिक्षण शिबिरात कोल्हापूर, सांगली, सातारा, सिंधुदुर्ग व रत्नागिरी जिल्ह्यातील ३७ मल्लखांबपटू सहभागी झाले होते. रत्नागिरी जिल्हा मल्लखांब संघटना, चिपळूण आणि डेरवणच्या एसव्हीजेसीटी स्पोर्टस् अकॅडमी यांच्यावतीने हे शिबिर घेण्यात आले.
प्रशिक्षण शिबिरात विभागातील वेगवेगळ्या जिल्ह्यातून तज्ज्ञ प्रशिक्षकांद्वारे खेळाडूंना मार्गदर्शन करण्यात आले. त्यांना कौशल्य सुधारण्यासाठी, छोट्या छोट्या चुका सुधारण्यासाठी, खेळासाठी लागणारी शारीरिक क्षमता कशी वाढवावी व खेळाडूंचा आहार कसा असावा यावर मार्गदर्शन करण्यात आले. शिबिर कालावधीत पुरलेला, टांगता व दोरीच्या मल्लखांबावर सकाळ व संध्याकाळच्या सत्रात सरावही घेण्यात आला. तसेच प्रात्यक्षिकासाठी लागणारा निराधार मल्लखांबाचाही खास सराव घेण्यात आला. या शिबिरासाठी जिल्ह्याचे मुख्य प्रशिक्षक रणवीर सावंत, कोल्हापूर जिल्ह्याचे विशाल पाटील, सांगलीतील वैभव हवलदार व गौरव आंब्रे यांचे मार्गदर्शन लाभले. शिबिराच्या समारोपाला एसव्हीजेसीटी स्पोर्ट्स अॅकॅडमीचे संचालक श्रीकांत पराडकर, शिवछत्रपती पुरस्कार विजेते सुजित शेडगे, जिल्हा संघटनेचे सचिव शिव-छत्रपती पुरस्कार प्राप्त शांताराम जोशी उपस्थित होते. याप्रसंगी सहभागी खेळाडूंना प्रमाणपत्र देवून गौरविण्यात आले.