पाली : अष्टविनायक तीर्थक्षेत्र पाली येथील श्री बल्लाळेश्वर मंदिराकडे (Ballaleshwar Temple) जाणाऱ्या रस्त्याची दूरवस्था झाली आहे. या रस्त्यावर ठिकठिकाणी खड्डे पडले आहेत. पाली नगरपंचायततर्फे (Pali Nagar Panchayat) या ठिकाणी तात्पुरती उपाययोजना म्हणून खडी टाकण्यात आली आहे. मात्र, या खडीवरून घसरून आतापर्यंत चार ते पाच बाईकस्वार जखमी झाले आहेत. शनिवारी (ता. 13) रात्री या ठिकाणी चार बाईकस्वार तर, रविवारी (ता. 14) एक बाईकस्वार घसरून कोसळले व जखमी झाले आहेत.

रस्त्यावर टाकण्यात आलेल्या या खडीमुळे दुचाकीस्वारांचे चाक घसरत आहे. आणि तोल जाऊन ते खाली कोसळत आहेत. तसेच पादचाऱ्यांना देखील येथून मार्ग काढताना अडथळा निर्माण होत आहे. यामुळे अनेक नागरिकांनी संताप व्यक्त केला आहे. तसेच या खडीमध्ये आणखी पाणी साचून राहते. आणि वाहतुकीला अडथळा निर्माण होत आहे.

हा रस्ता खूप खराब झाला आहे. येथून मार्ग काढणे गैरसोईचे होते. त्यातच आता टाकलेल्या खडीवरून घसरून अनेक बाईकस्वार जखमी झाले आहेत. हा रस्ता योग्य प्रकारे सुस्थितीत करणे गरजेचे आहे, असे पालीतील ग्रामस्थ महेश गोळे यांनी सांगितले.

श्री बल्लाळेश्वर मंदिराकडे जाणाऱ्या रस्त्याची दूरवस्था झाली आहे. यामुळे भाविक, पर्यटकांना तसेच लहान मुले, वयस्कर लोकांना येथून मार्ग काढताना खूप त्रास सहन करावा लागत आहे. त्यातच या खड्ड्यांवर उपाय म्हणून नगरपंचायततर्फे येथे खडी टाकण्यात आली आहे. आणि हा रस्ता आता अधिक धोकादायक झाला आहे. या खडीमुळे रोगापेक्षा उपाय भयंकर झाला आहे. येथील नागरिक, बाईकस्वार व भाविकांना याचा खूप त्रास होत आहे. या ठिकाणी तात्पुरत्या स्वरूपात खडी टाकण्याऐवजी ठोस उपाययोजना करण्याची गरज होती.

-सुशील शिंदे, भाजप शहराध्यक्ष, पाली

पालीतील इतर सर्व मुख्य रस्त्यांचे डांबरीकरण झाले आहे. तसेच अनेक ठिकाणचे रुंदीकरण करण्यात आले आहे. मात्र, या ठिकाणचा रस्ता काही तांत्रिक कारणामुळे प्रलंबित राहिला आहे. अन्यथा, हा रस्ता देखील सुस्थितीत झाला असता. पावसाळ्यात भाविक व नागरिकांना खड्ड्यांचा त्रास होऊ नये यासाठी उपाययोजना म्हणून या ठिकाणी ग्रिट व खडी टाकण्यात आली आहे. यामुळे नागरिकांना काही त्रास होत असेल तर ती अतिरिक्त ग्रिट व खडी बाजूला काढण्यात येईल.

-प्रणाली शेळके, नगराध्यक्षा, पाली