संगमेश्वर (रत्नागिरी) : - ' संगमेश्वर येथील छत्रपती संभाजी महाराज यांचे अपुर्णावस्थेतील  स्मारकाच्या  दुर्दैवाचे फेरे आज ३२  वर्षांनंतरही संपलेले नाहीत . संभाजी राजांचे भव्यदिव्य स्मारक उभारायचे हा हेतू निश्चितच अभिमानास्पद होता मात्र जिद्द आणि चिकाटीचा अभाव असल्याने ६५ लाखांपेक्षा अधिक निधी खर्च होवूनही या स्मारकाची अत्यंत दयनीय अशी अवस्था झाली आहे.

 संगमेश्वर येथील संभाजी प्रेमी युवक पर्शुराम पवार यांनी धामणी येथील युवकांना मदतीला घेऊन स्मारकाचा सर्व परिसर दिवसभर राबून श्रमदानाने स्वच्छ केला .

हेही वाचा- मत्स्यव्यवसायांसाठी खुशखबर बजेटमध्ये मोठी घोषणा....

स्मारकाची दुर्दशा अद्यापही
इतिहास प्रेमी तसेच पर्यटक यांची मागणी लक्षात घेऊन ११ मार्च १९८६ साली मुंबई गोवा महामार्गावर संभाजी महाराजांचं भव्यदिव्य स्मारक उभारावं म्हणून भूमीपूजन करण्यात आले . या स्मारकात ग्रंथालय ,संभाजी महाराजांच्या जीवनावरील तैलचित्र , म्युरल , अर्धप्रतिमा आदि गोष्टींचे नियोजन करण्यात आले .  सुरु झालेले काम १९९२ साली सात फुटांपर्यंत भिंतींचं बांधकाम झाल्यावर निधी अभावी रखडले ते अनेक वर्षे तसेच होते .  लोकप्रतिनिधींनीही यामध्ये लक्ष घातल्यानंतर परत निधीचा ओघ सुरु झाला . जिल्हा नियोजन मंडळानेही भरीव निधी दिला .  सर्व मिळून जवळपास ६५ लाखांपेक्षा अधिक निधी खर्च झाला असला तरी या स्मारकाची दुर्दशा अद्याप संपलेली नाही.    

हेही वाचा-  कोरोनामुळे फ्रोजन निर्यातीला बसणार मोठा फटका...

अजून किती वर्ष सहन करायचा ? ​
      संभाजी स्मारकाची इमारत पुर्ण झाली मात्र याकडे कोणाचेही लक्ष नसल्याने ही इमारत प्रेमीयुगुलांचे , मद्यपींचे , गर्दुल्यांचे आडोशाचं ठिकाण बनलं . संगमेश्वर येथील संभाजी प्रेमी युवकांनी पर्शुराम पवार यांच्या नेतृत्वाखाली शासकीय यंत्रणेसह पोलीस यंत्रणेचं लक्ष वेधलं . यानंतरही स्मारक समिती मार्फत कोणतेही खास प्रयत्न झाले नाहीत . पावसाळ्यात स्मारकाला दरवर्षी झाडं झुडपे आणि वेली वेढतात आणि पावसाळ्यानंतर संभाजीप्रेमी स्मारकाची साफसफाई करतात . हा प्रकार संभाजी प्रेमींनी अजून किती वर्ष सहन करायचा ? असा सवाल पर्शुराम पवार यांनी उपस्थित केला आहे .