कोकण - आज अर्थसंकल्पीय अधिवेशनाच्या दुस-या आठवड्यातील चौथा दिवस आहे. आजच्या दिवशी मुख्यमंत्री उद्धव ठाकरे यांनी कोकणासाठी मोठी घोषणा केली आहे. कोकणचं वैभव राखण्यासाठी सरकार कटिबद्ध असून जलदुर्गांचा विकास करुन पर्यटन वाढवू. तसेच येत्या एप्रिलमध्ये कोकणात व्हायरोलॉजी लॅब सुरू करणार आणि चांगली दवाखाने सुरू करणार असल्याची घोषणा मुख्यमंत्र्यांनी केली आहे.

चिपी विमानतळ सुरु करणार

दरम्यान, नाणारचा उल्लेख न करता उद्धव ठाकरे यांचं उत्तर दिलं. यावर ते म्हणाले की 'कोकणकिनारपट्टीवर जर प्रकल्प आणायचे असतील तर जे वैभव आहे ते टिकवलं पाहिजं. कृत्रिम प्रकल्पासाठी निसर्गाचं नुकसान नको. एक मेपर्यंत चिपी विमानतळ सुरू करणार असून अधिकाऱ्यांना तसे निर्देश दिले आहेत. फक्त बोलाची कढी बोलाचा भात नाही प्रत्यक्ष काम करत आहोत. विकास करताना आपल्याकडे काय आहे हे पाहायला हवं. कोकणचा काॅलिफोर्निया करायचं सांगितलं पण अजून काही झालं नाही. कुठलीही पाणी योजना रद्द किंवा थांबवलेली नाही.'असं ही ते म्हणाले.