मंडणगड (रत्नागिरी) : मुंबईतून आलेली रक्ताची माणसं भिंतीच्या पलीकडे होम क्कारंन्टाईन करण्यात आली. अंगा खांद्यावर खेळणारी नातवंडे चार भिंतीच्या घरात चिडीचूप बसली. भावनांना आवर घालीत सोशल डिस्टन्सचे नियम पाळत मंडणगड तालुक्यातील अनेक गावांतून स्वतःसह आपल्या माणसांच्या आरोग्याची काळजी घेतली जात असल्याचे चित्र आहे. त्यामुळे कोरोनाने मानवी जीवनाची नितीमुल्य बदलून टाकल्याची भावना प्रत्येकाच्या मनात येवू लागल्या आहेत.

  मे महिना म्हटलं की मंडणगड तालुक्यात ग्रामीण भागातील शांतता भंग होत गावे गजबजून जातात. सार्वजनिक पूजा, ग्रामदेवतेचे उत्सव, लग्न, हळदी समारंभ, क्रीडा स्पर्धा अशा विविध प्रकारच्या धार्मिक, सामाजिक कार्यक्रमाचे आयोजन करण्यात येते. यानिमित्ताने गावापासून रोजगारासाठी दूर गेलेली कुटुंब एकत्रित येत असतात. मात्र कोरोना महामारीचा प्रादुर्भाव प्रचंड वाढू लागल्याने त्याचे सावट गावात सुद्धा पोहचले.

हेही वाचा- झाले हताश अन् शेवटी पारंपरिक मच्छीमारांना घ्यावा लागला हा निर्णय....

 भिंतीच्या पलीकडे रक्ताची नाती

कोरोनाच्या भीतीमुळे मुंबईत स्थलांतरित झालेला तालुक्यातील नागरिक गावात परतू लागला आहे. त्यांना होम कोरोन्टाईन करण्याचा प्रशासनाने निर्णय घेतला आहे. त्याची अंमलबजावणी चोख पद्धतीने झाल्यास नागरिकांचे आरोग्य सुरक्षित आणि निरोगी राहू शकणार असल्याने जागरूकता वाढली आहे. त्यामुळे अनेक गावांतून गावातील बंद घरे, शाळा, अंगणवाडी, मंदिरे यांचा वापर करून मुंबईतून येणाऱ्या रक्ताची माणसे, नातेवाईक यांना क्कारंन्टाईन करण्यात येत आहे.

आजी आजोबा म्हणत बिलगणारी नातवंडे गप्प राहून आपल्या वडिलांसोबत व्यवस्था केलेल्या घरात शांतपणे शिरत बंदिस्त होत आहेत. कधीही न अनुभवलेल्या या घटनेने ग्रामस्थांची व मुंबईकरांची मने काही क्षणासाठी हेलावली जात आहेत. मात्र कोरोनाला हरवायचं आणि आपण जिंकायचं यामुळे मनावर कर्तव्य कठोरतेचा दगड ठेवत नियमांची पाळवणूक करताना ग्रामस्थ व मुंबईकर दिसून येत आहेत. मुंबईकरांची जेवण, पाणी व मूलभूत सुविधांची व्यवस्था करताना त्यांची विशेष काळजी घेतली जात आहेत.

हेही वाचा- क्षणाचाही विचार न करता तिने मध्यरात्री गर्भवती महिलेस नेले रुग्णालयात : त्या दोघींना मिळाला जणू पुनर्जन्मच

कोकणवासीयांची कोरोनामुळे कसोटीची परीक्षा
 कोकणातील मानवी जीवन सध्या अशा एका वळणावर आले आहे की, त्यातून स्वतःचा मार्ग स्वतःला निवडावा लागेल. प्रथम रोजगारासाठी स्थलांतरित झालेला कोकणवासीय आता स्वतःचा जीव वाचवण्यासाठी पुन्हा स्थलांतरित होत आहे. यात त्याची अक्षम्य परवड होत असून त्यामुळे कोकणवासीयांची मने विविध विचारांनी उद्विग्न झाली आहेत. कोरोनाच्या पार्श्वभूमीवर अनुभवलेला मनस्ताप, शेकडों किमीची पायपीट, रोखणाऱ्या विविध नजरा आणि मिळणारी वागणूक यामुळे ही मानवी मने अजूनतरी तरली असून कोकणातील नागरिकांना आपली मने घट्ट करावी लागणार आहेत.

हेही वाचा- कोरोनाबाधिताने केला महिला डाॅक्टरांच्याच गाडीतून प्रवास अन् पुढे घडले असे काही.....

मनावर दगड ठेवत कर्तव्यकठोरतेचे पालन

शासन, प्रशासनाविरुद्ध निर्माण झालेली चीड विविध मार्गाने संतापाद्वारे व्यक्त होवू लागली आहे. आपल्याच माणसांकडून मिळणारी अनपेक्षित विचारांची वागणूक काही ठिकाणी मनोबल उंचावणारी तर काही वेळेला खच्चीकरण करणारी ठरत आहे. मागील वीस वर्षांत कोकणातून मोठा वर्ग रोजगार, शिक्षण यासाठी मुंबई सारख्या मेट्रोशहरात स्थलांतरित झाला. यात मंडणगड, दापोली तालुक्यातील नागरिकांचा समावेश हा अन्य तालुक्यातील संख्येच्या मानाने जास्त आहे. कुटुंबाच्या कुटुंब स्थलांतरित झाल्याने गावे ओस पडली. शेकडों घरे कुलूप बंद झाली. याला जबाबदार कोण यावर मतमतांतरे असून राजकीय इच्छाशक्ती पूर्णतः कारणीभूत असल्याचे बोलले जात आहे. तर स्थानिकांची मानसिकता नसल्याची ओरड होत आहे. मात्र वास्तव समोर असून त्याला सामोरे जात असताना सामान्य नागरिकांची फरपट होते हे नक्की.