मंडणगड ः जय भवानी मित्र मंडळ व रिक्षा संघटना देव्हारेच्या माध्यमातून गेल्या सत्तावीस वर्षांपासून एकता, समता, बंधुत्व आणि सामंजस्य निर्माण करणारा नवरात्र उत्सव साजरा करण्यात येतो. यातून सर्वधर्मीय नागरिकांमध्ये एकोपा व एकजूट अशी विविधतेतून एकतेचे दर्शन घडून येत आहे. मंडळाने विविध उपक्रम राबवून सामाजिक बांधीलकी जपण्याचे काम केले आहे. कोरोनाच्या पार्श्वभूमीवर या वर्षी समाजहिताचे उपक्रम राबवून हा उत्सव साजरा करण्यात येत आहे.

अनेक धर्माचे रिक्षा व्यावसायिक, दुकानदार संघटनेचे सभासद आहेत. व्यवसाय करत असताना अनेक अडचणी येतात. त्यातून वादविवाद निर्माण होत असतात. मात्र, ग्रामीण भाग असूनही या संघटनेतील सदस्यांनी आपली एकजूट कायम ठेवत मोठ्या गुण्यागोविंदाने एकत्र राहून हा उत्सव साजरा करीत आहेत.

परिसरातील अनेक पंचक्रोशीतील सर्व धर्मांचे नागरिक उपस्थित राहून दर्शन घेतात. त्यात विविधतेतून एकतेचा संदेश मिळतो. चिंचघर येथील भारजा नदी पात्रात मूर्तीचे विसर्जन करण्यात येते. उत्सव साजरा करण्यासाठी अध्यक्ष अजय म्हाब्दी, उपाध्यक्ष हरिश्चंद्र फराटे, सेक्रेटरी रामचंद्र फराटे, विपुल म्हाब्दी, तुषार करावडे आदी परिश्रम घेत आहेत.

१९९२ सालापासून..

१९९२ साली मंडणगड तालुक्यातील देव्हारे बाजारपेठ परिसरात रिक्षा स्टॅंडजवळ संघटनेच्या वतीने नवरात्र उत्सव सुरू करण्यात आला. एका छोट्या झोपडीतून सुरू झालेला हा उत्सव आज मोठ्या जल्लोषात साजरा केला जातो.