रत्नागिरी : रत्नागिरी जिल्ह्यासाठी एक शुभ वार्ता आहे. कोरोना पॉझिटिव्ह रुग्ण आढळलेल्या क्षेत्रास कोरोना विषाणू बाधित क्षेत्र घोषित केले जाते. अशा विषाणू बाधित क्षेत्र अर्थात कन्टेनमेंट झोनची संख्या 130 वरून 30 झाली आहे. परंतु रविवारी (ता. 14) रात्री उशिरा आलेल्या अहवालानुसार आणखी 13 रुग्ण पॉझिटिव्ह आले आहेत. त्यामुळे एकूण पॉझिटिव्ह रुग्णांची संख्या 431 झाली आहे. सोमवारी सायंकाळपर्यंत प्राप्त अहवालात एकही रुग्ण पॉझिटिव्ह आढळला नाही. 

जिल्ह्यात सध्या 30 ऍक्‍टिव्ह कन्टेन्मेंट झोन आहेत. त्यामध्ये रत्नागिरी तालुक्‍यात 3 गावांमध्ये, गुहागर- 1, खेड- 4, संगमेश्वर- 2, दापोली- 5, लांजा- 1, चिपळूण-6, राजापूर- 6 आणि मंडणगडमधील 2 गावांचा समावेश आहे. 

जिल्ह्यात दिवसभरात चौघे कोरोनामुक्त झाले. त्यांना घरी सोडण्यात आले. त्यामुळे कोरोनामुक्तांची टक्केवारी 70 टक्के झाली. कोरोनाने आत्तापर्यंत 17 मृत्यू झाले आहेत. सध्या उपचार घेणाऱ्या रुग्णांची संख्या 109 आहे. दिवसभरात कोव्हीड केअर सेंटर सामाजिक न्याय भवन येथील तीन आणि जिल्हा शासकीय रुग्णालय येथील एका रुग्णाला घरी सोडण्यात आले आहे. आज सकाळपर्यंतचे 13 पॉझिटिव्ह रुग्ण आढलले. त्यामध्ये कळंबणी (खेड) - 9, रत्नागिरी- 3 आणि देवरुखमधील एकाचा समावेश आहे. कन्टेनमेंट झोनची जिल्ह्यातील संख्या 130 होती. मात्र आता ती 30 झाली आहे. एकूण 48 गावांपैकी 18 गावांचा 14 दिवसांचा कालावधी आज संपला आहे. संस्थात्मक विलगीकरणात 37 संशयित रुग्ण दाखल आहेत. आजअखेर होम क्वारंटाईन असणाऱ्यांची संख्या 51 हजार 355 इतकी आहे. 

           जिल्ह्यातील स्थिती 

• एकूण बाधित रुग्ण -431 
• पैकी बरे झालेले रुग्ण -305 
• सध्या उपचार सुरू असलेले -109 
• जिल्ह्यातील मृत्यू - 17