रत्नागिरी - नेत्रावती, मत्स्यगंधा या गाड्यांना संगमेश्‍वर स्थानकात थांबा मिळावा, असा प्रस्ताव रेल्वे मंत्रालयाकडे पाठविण्याचा निर्णय खासदार विनायक राऊत, कोकण रेल्वे अधिकारी यांच्या संयुक्त बैठकीत घेण्यात आला.

कोकण रेल्वे प्रकल्पग्रस्त आणि रेल्वेस्थानकांवरील सुविधा यावर चर्चा करण्यासाठी रत्नागिरीत बैठक झाली. त्यात आमदार राजन साळवी यांनी राजापूर स्थानकावर सुविधा मिळाव्यात यासाठी विशेष मुद्दे उपस्थित केले. त्यावर तोडगा काढण्यासाठी रेल्वे अधिकाऱ्यांनी आश्वासन दिले. या बैठकीला रेल्वेचे अध्यक्ष गुप्ता, विभागीय व्यवस्थापक उपेंद्र शेंडये, नंदू तेलंग यांच्यासह अन्य उपस्थित होते. 

राजापूर स्थानकावरील प्लॅटफार्मवर एक्‍सलेटर बसवावा अशी मागणी केली. मात्र त्याला एक कोटीहून अधिक खर्च येऊ शकतो. त्याऐवजी राजापूर स्थानकावर लिफ्ट उभारण्याचा निर्णय झाला आहे. १० माणसे एकावेळी जातील अशी ही लिफ्ट असेल. त्याचा खर्चही लाखात आहे. 

हे काम येत्या काही दिवसांत सुरू होणार असून पाच ते सहा महिन्यांत लिफ्ट सुरू होणार आहे. फलाटावर रुंदीकरण करण्याचा विचार नाही. त्यासाठी एक कोटी रुपये खर्च आहे. त्याऐवजी सपाटीकरण करून स्थानकावर टाईल्स बसवण्यात येणार आहे. निवसर येथे फूटब्रिजची गरज आहे. त्यादृष्टीने प्रयत्न सुरू आहेत, असे कोकण रेल्वे अधिकाऱ्यांनी सांगितले.

राजापूर स्थानकाची उंची वाढवा
राजापूर स्थानकाची उंची वाढवावी, अशी मागणी केली. मात्र रेल्वे प्रशासनाने उंची वाढवण्यासाठी निधीची गरज आहे. आमदार किंवा खासदार फंडातून निधी मिळाला तर उंची वाढवण्याचा निर्णय प्रशासन घेईल. त्यासाठी आम्हाला पत्र द्या, अशी सूचना आमदार साळवी यांनी केली.