मालवण (सिंधुदुर्ग): मच्छीमारांना नुकसान भरपाईपोटी मंजूर केलेल्या विशेष पॅकेजमधून वंचित असलेल्या जिल्ह्यातील मच्छीमार लाभार्थ्यांसाठी शासनाने ३ कोटी ७१ हजार २०० रुपयांचा निधी मंजूर केला आहे. याबाबतचे पत्र येथील सहायक मत्स्यव्यवसाय आयुक्त कार्यालयास प्राप्त झाले आहे. हा निधी लवकरच संबंधित मच्छीमारांच्या खात्यात जमा होणार आहे. आमदार वैभव नाईक यांच्या पाठपुराव्यामुळे जिल्ह्याला हा निधी उपलब्ध झाल्याची माहिती मच्छीमार नेते तथा शिवसेना शहरप्रमुख बाबी जोगी यांनी दिली.

समुद्रात सातत्याने आलेल्या वादळांमुळे मच्छीमारांचे मोठ्या प्रमाणात नुकसान झाले होते. या नुकसानीपोटी शासनाने मच्छीमारांना विशेष पॅकेजचा लाभ देत दिलासा दिला. या पॅकेज अंतर्गत याआधी ८३१ लाभार्थ्यांना १ कोटी ९० लाखाचा निधी खात्यात जमा केला आहे. यात जिल्ह्यातील काही मच्छीमार लाभार्थी वंचित असल्याने यासाठी आणखी निधी आवश्यक होता. याबाबत आमदार वैभव नाईक यांनी मच्छीमारांना निधी कमी पडू देणार नाही असे आश्वासन दिले होते.

शासनाकडे वंचित मच्छीमार लाभार्थ्यांसाठी ४ कोटी ६४ लाख रुपयांची मागणी करण्यात आली होती त्यानुसार जिल्ह्याला ३ कोटी ७१ हजार २०० रुपयांचा निधी उपलब्ध झाला आहे. आमदार नाईक यांनी केलेल्या पाठपुराव्यामुळे हा निधी उपलब्ध झाला आहे. या मदतीमुळे मच्छीमारांना दिलासा मिळाला आहे. यात २००० रापणकर सदस्य, २२० नौकाधारक, ३५०० लहान मासळी विक्रेते अशा एकूण ५ हजार ७२० लाभार्थ्यांना या अनुदानाचा फायदा मिळणार आहे. लवकरच हा निधी संबंधित मच्छीमार लाभार्थ्यांच्या खात्यात जमा होणार आहे. वंचित मच्छीमारांना निधी उपलब्ध करून दिल्याबद्दल मत्स्यमंत्री अस्लम शेख, पालकमंत्री उदय सामंत, आमदार वैभव नाईक, मत्स्य आयुक्तांचे श्री. जोगी यांनी आभार मानले.