मालवण ( सिंधुदुर्ग ) - किल्ले सिंधुदुर्गला भेट देण्यास आलेल्या पर्यटकांना स्वतंत्र अभ्यांगत कराची पावती देणे आवश्‍यक असताना काही दिवसांपूर्वी आलेल्या 35 पर्यटकांच्या समूहाला एकत्रित हाती लिहीलेली कराची पावती देण्याचा प्रकार घडला आहे. ही कर आकारणी संशयास्पद असल्याचा अंदाज पर्यटकांनी व्यक्त करत या प्रकाराची चौकशी करावी, अशी मागणी पर्यटकांनी केली आहे. 

किल्ले सिंधुदुर्गला भेट देण्यास 8 मार्चला पर्यटकांच्या 35 जणांचा समूह गेला होता. किल्ला पाहण्यास येणाऱ्या प्रत्येक पर्यटकांकडून प्रत्येकी पाच रूपये अभ्यांगत कर स्विकारून त्याची रितसर पावती दिली जाते; मात्र या पर्यटकांना एकच पावती देत 175 रुपयांची आकारणी करण्यात आली. पाच रुपयांच्या अभ्यांगत कराची पावती ही प्रिंटेड स्वरूपाची असताना पर्यटकांना हाती लिहून कराची आकारणीची पावती देण्यात आली. त्यामुळे ग्रामपंचायतीच्या कामगारांकडून होणारी कर आकारणी ही संशयास्पद असल्याचे पर्यटकांनी स्पष्ट करत या प्रकाराची सखोल चौकशी करावी, अशी मागणी केली आहे. 

दरम्यान यासंदर्भात दुसरी बाजू जाणून घेण्यासाठी, वायरी भुतनाथ ग्रामपंचायतीचे ग्रामसेवक सुनील चव्हाण यांच्याशी संपर्क साधला असता ग्रामपंचायतीच्या कामगारांनी संबंधित पर्यटकांना एकत्रित पावती दिली असल्याचे स्पष्ट केले. या प्रकाराची तक्रार ग्रामपंचायतीकडे आल्यानंतर सरपंच व आपण संबंधित कामगारांना बोलावून घेत या प्रकाराची माहिती घेतली. एकत्रित पावती पर्यटकांना देणे चुकीचे असल्याचे स्पष्ट करत यापुढे असा प्रकार घडता नये, अशा सूचना देत योग्य ती समज देण्यात आली असल्याचे त्यांनी स्पष्ट केले.