बांदा : शासन निर्देशानुसार शासकीय योजना तसेच नैसर्गिक आपत्तीमधील नुकसानभरपाई मिळविण्यासाठी ई-पीक नोंदणी करणे आवश्यक आहे. ई-पीक अॅपच्या माध्यमातून शेतकऱ्यांनी सातबारावर पिकाची नोंदणी करावी, असे आवाहन मडुरा सजा तलाठी व्ही. एस. कविटकर यांनी मडुरा येथे केले.

सुधारित मोबाईल अॅपमध्ये प्रत्येक गटाच्या मध्यबिंदूचे अक्षांश व रेखांश समाविष्ट असतात. शेतकरी ज्यावेळी पिकाचा फोटो घेतील, त्यावेळी फोटो घेण्याच्या ठिकाणापासून त्या गटाच्या मध्यबिंदूपर्यंतचे अंतर आज्ञावलीत दिसणार आहे. पीक पाहणीसाठी निवडलेल्या गटापासून शेतकरी दूर असल्यास तसा मेसेज मोबाईल अॅपमध्ये दाखविण्यात येणार आहे. मोबाईल अॅपद्वारे नोंदविलेली पीक नोंदणी चुकीची झाल्यास ४८ तासांच्या आत त्यामध्ये बदल करण्याची सुविधा दिली आहे.

किमान आधारभूत योजनेंतर्गत येणाऱ्या पाहणीसाठी पिकांची ई-पीक नोंदणी केल्यास अॅपमध्येच शेतकऱ्यांना आपणास किमान आधारभूत विक्रीसाठी नोंदणी करायची आहे का, असा प्रश्न विचारला जाणार आहे. शेतकऱ्यांनी ‘होय’, असा पर्याय निवडल्यास अशा सर्व शेतकऱ्यांची माहिती वेब प्रणालीद्वारे पुरवठा विभागाकडे प्राप्त होणार आहे. त्यामुळे किमान आधार योजनेंतर्गत अशा शेतकऱ्यांची आपोआपच नोंदणी होणार आहे.

या अॅपमध्ये एक मुख्य पीक व अन्य तीन दुय्यम पीके नोंदणी करण्याची मुभा आहे, अशी माहिती कविटकर यांनी दिली. यावेळी मडुरा सोसायटी माजी चेअरमन ज्ञानेश परब, बाळू गावडे, यशवंत माधव, माजी उपसरपंच उदय चिंदरकर, दत्ताराम परब, रामा परब, दिनेश परब, केशव परब, प्रीतेश गवंडी, संभाजी परब, कोतवाल नाना वेंगुर्लेकर आदी उपस्थित होते.