रत्नागिरी - गेले आठवडाभर जिल्ह्यात मुसळधार पाऊस झाला आहे. मोठ्या नद्यांसह उपनद्यांनाही पूर आला आहे. संगमेश्वर तालुक्‍यातील कोंड्ये-डावखोल गावातून वाहणाऱ्या नदीचा प्रवाह बदलला असून, शेजारच्या भातशेतीला फटका बसला आहे. नदीचे पाणी पात्र सोडून बाहेर पडले असून, आजूबाजूची सुमारे शेकडो एकर जमीन धोक्‍यात आली आहे. 

जिल्ह्यातील पावसाचा जोर अजूनही कायम आहे. शुक्रवारी (ता. 26) सकाळी 8.30 वाजेपर्यंतच्या 24 तासांत जिल्ह्यात सरासरी पाऊस 57.11 मि.मी. पाऊस पडला आहे. त्यात मंडणगड 117, दापोली 62, खेड 87, गुहागर 47, चिपळूण 47, संगमेश्‍वर 39, रत्नागिरी 44, लांजा 48, राजापूर 23 मि.मी. पावसाची नोंद झाली आहे. गेले आठवडाभर सगळीकडेच पावसाचा जोर आहे.

संगमेश्‍वर तालुक्‍यात संततधार पाऊस सुरूच असल्यामुळे गावातून वाहणाऱ्या नदीने प्रवाहच बदलला आहे. डावखोल, कोंड्ये येथील नदी थेट भात शेतामधूनही वाहत आहे. किनारी भागात जवळपास 200 एकर शेतजमीन आहे. पावसाचा जोर कमी होऊनही सध्या नदीचा प्रवाह बदललेलाच आहे.

या भागात लावण्यांची कामेही पूर्ण झालेली आहेत. पावसामुळे पिकेही तरारू लागली होती. प्रवाहाबरोबर आलेल्या दगड-मातीमुळे शेतीची वाताहत झाली आहे. या भागातील बहुतांश शेतकऱ्यांचे भात मुख्य पीक आहे. त्याचेच नुकसान झाल्यामुळे यंदा गैरसोय होणार आहे. प्रवाह बदलण्याला गाळ कारणीभूत असल्याचा अंदाज वर्तविला जात आहे. नुकसानीचे पंचनामे झाले असून, भरपाई लवकरात लवकर मिळावी, अशी मागणी येथील शेतकऱ्यांनी केली आहे. 

योग्य नुकसानभरपाई मिळावी आणि या नदीतील गाळ उपसला जावा, अशी मागणी प्रशासनाकडे केली आहे. 
- पूनम देसाई, सरपंच, कोंड्ये