पाली : सुधागड तालुका बौद्धजन पंचायत र. नं. 2756 या संस्थेच्या वतीने बुधवारी (ता. 3) क्रांतीज्योती सावित्रीबाई फुले यांची जयंती उत्साहात साजरी करण्यात आली. पालीतील डॉ. बाबासाहेब आंबेडकर स्मारकात जयंती साजरी झाली. यावेळी विविध वैचारीक व प्रबोधनकारी कार्यक्रमाचे आयोजन करुन सावित्रीबाईंना अभिवादन करण्यात आले. 

आद्य शिक्षिका, स्त्री शिक्षणाच्या प्रणेत्या, क्रांतीज्योती सावित्रीबाई फुलेंचे कार्य प्रेरणादायी व क्रांतीकारी आहे. सावित्रीबाईंचा निस्सीम त्याग व धैर्यामुळे आजच्या महिलेला समाजात मानाचे व प्रतिष्ठेचे स्थान प्राप्त झाले आहे. सावित्रीमाईंचे प्रगतशिल व शिक्षित समाज घडविण्याचे कार्य पुढे नेणे हिच खरी काळाची गरज असल्याचे प्रतिपादन सुधागड तालुका बौध्दजन पंचायत र. नं. 2756 या संस्थेच्या महिला अध्यक्षा रोहिणी जाधव यांनी केले. नुतन शिंदे यांनी आपल्या मार्गदर्शनात शिक्षण हे सामाजिक परिवर्तनाचे मुख्य साधन आहे. शिक्षणाखेरीज मनुष्याचा विकास साधणार नाही असे सांगितले. अस्मिता कांबळे म्हणाल्या की फुले दाम्पत्यांनी जुन्या,चालीरित्या व रुढी परंपरांना मोडून काढण्याचे काम केले. समतेचा ज्वालामुखी ह्रदयात ठेवून कायम समाजसुधारणेचे कार्य केले. 

आरती महाडीक म्हणाल्या की जोतीबा फुले व सावित्रीमाई फुले यांच्या कार्याला अधिक मजबुती देण्याचे काम महामानव डॉ. बाबासाहेब आंबेडकरांनी या देशाला संविधान बहाल करुन दिले. संविधानाने महिलांसह प्रत्येक नागरीकाला समान हक्क व अधिकार प्राप्त झाले आहेत. यावेळी प्रभाकर गायकवाड यांनी म. जोतीबा फुले व सावित्रीबाई फुले यांनी शिक्षणाचे महत्व ओळखून समाज शिक्षीत करण्याकरीता केलेल्या महान कार्याचे महत्व विषद केले. 

यावेळी बौध्द धम्म प्रसारक प्रभाकर गायकवाड, रि.पा.इं सुधागड तालुकाध्यक्ष राहूल सोनावळे, महिला अध्यक्षा रोहिणी जाधव, सुधागड तालुका बौ.पं.म.कमिटी अध्यक्ष दिपक पवार, भगवान शिंदे, रविंद्रनाथ ओव्हाळ, दिलीप मोरे, बौध्दाचार्य भिम महाडीक, सिध्दांत गायकवाड, विवेक रोकडे, सतिष गायकवाड, नुतन शिंदे, अस्मिता कांबळे, अंकिता गायकवाड, आरती महाडीक, सविता मोरे, सारिका गायकवाड, वंदना गायकवाड, ज्योती जाधव, रोशनी गायकवाड,आदिंसह महिला मंडळ, भिम अनुयायी, धम्मबांधव उपस्थित होते.