सिंधुदुर्गनगरी -  सरत्या वर्षाला निरोप आणि नव्या वर्षाच्या स्वागताचा जल्लोष रात्री 11 पर्यंत उरकावा लागणार आहे. गृह विभागाने यासाठीच्या मार्गदर्शक सूचना जारी केल्या आहेत. रात्री 11 नंतर जिल्ह्यात संचारबंदी लागू होणार आहे. 

कोरोना विषाणूचा प्रादुर्भाव रोखण्यासाठी थर्टी फस्टचा जल्लोष साजरा कसा करावा? याबाबत गृह विभागाने मार्गदर्शक सूचना जारी केल्या आहेत. वर्षाला निरोप आणि नूतन वर्षाचे स्वागत करताना रात्री 10 पर्यंत मद्य विक्री व हॉटेल सुरू राहणार असून 11 नंतर संचारबंदी लागू होणार आहे. फटाक्‍यांच्या आतषबाजीवर बंदी असून धार्मिक, सांस्कृतिक कार्यक्रमाचे आयोजन करता येणार नाही. 

गृह विभागाने मार्गदर्शक सूचना जारी केल्या आहेत. त्यानुसार नागरिकांना घरीच नववर्षाचे स्वागत करावे लागणार आहे. सार्वजनिक ठिकाणी मोठ्या संख्येने गर्दी न करता नियमाचे पालन करावे. माक्‍सचा वापर करावा. 60 पेक्षा जास्त वय असलेले नागरिक आणि 10 वर्षाखालील मुलांनी घराबाहेर पडू नये. धार्मिक स्थळावर गर्दी करू नये.

ध्वनी प्रदूषणाच्या अनुषंगाने नियमाचे पालन करण्याच्या सूचना देण्यात आल्या आहेत. शासकीय तसेच खासगी रुग्णवाहिकांची सेवा, रात्रीच्या वेळेस सुरू राहणारी औषधाची दुकाने, पेट्रोल पंप व भाजीपाला विक्री, दूध व दुग्धजन्य पदार्थ विक्री करणाऱ्या डेरी, रेल्वेने तसेच एसटी बस व खासगी वाहनाने उतरणाऱ्या प्रवाशांकरिता ऑटोरिक्षा यांना संचारबंदीच्या कालावधीत मुभा राहणार आहे. 

संपादन - राहुल पाटील