चिपळूण (रत्नागिरी) :  तालुक्‍यातील कोकरे घाणेकरवाडी येथे नव्याने खुदाई केलेल्या बोअरवेलला गरम पाण्याचे झरे लागले आहेत. मंगळवारी (ता.30) रात्री 11 च्या सुमारास ही घटना घडली. जमिनीपासून सुमारे 5 फुट उंचीपर्यंत 6 इंची पाईपमधून कुपनिलेकतून गरम पाणी बाहेर पडत आहे. कोकरे-घाणेकरवाडी येथील संजय दळवी यांच्या शेतात मारलेल्या बोअरवेलच्या ठिकाणी हा प्रकार घडला असून पाहणीसाठी लोक धाव घेत आहेत.

मुंबई-गोवा राष्ट्रीय महामार्गावर आरवली व राजवाडी, दापोली तालुक्‍यातील उन्हवरे येथे गरम पाण्याची कुंडे आहेत. गेल्या अनेक वर्षापासून या कुंडामध्ये गमर पाण्याचा प्रवाह अखंडपणे वाहत आहे. उन्हाळ्यातील पाणी टंचाईमुळे कोकरे-घाणेकरवाडी येथील संजय दळवी शेतात बोअरवेल मारत होते. सायंकाळी 6 वाजता बोअरवेलचे काम सुरू झाले. रात्री 11 च्या सुमारास गरम पाण्याचे फवारे बाहेर पडू लागले.

हेही वाचा- शिवसेनेच्या प्रवक्तेपदी भास्कर जाधव यांची निवड

अगदी उकळल्यासारखे हे पाणी आहे. काही महिन्यापूर्वी खेरशेत येथे बोअरवेल खोदाई करताना गरम पाणी लागले होते. मात्र गरम पाण्याचे प्रमाण कमी होते. दळवी यांनी 175 फुट बोअरवेल खोदाई केली आहे. 6 इंची पाईपने गरम पाणी भरून बाहेर पडत आहे. ही घटना पाहण्यासाठी बघ्यांची गर्दी होऊ लागली आहे. गरम पाण्याचे झरे वाहू लागले आहेत. संबंधित शासकीय अधिकारी व भुगर्भ शास्त्रज्ञांनी घटनास्थळी भेटी दिलेल्या नाहीत.

संपादन- अर्चना बनगे