चिपळूण (रत्नागिरी) : तालुक्‍यातील जिल्हा परिषद प्राथमिक शिक्षकांच्या पगारापोटी लाखोंची रक्कम पंचायत समितीकडे जमा झाली आहे. मात्र, पगार बिलावर गट शिक्षणाधिकाऱ्यांची सही झालेली नाही. गट शिक्षणाधिकाऱ्याचा पदभार स्वीकारण्यास अधिकारी धजावत नसल्याने तालुक्‍यातील ११०० शिक्षकांचे पगार रखडले आहेत. यावरून तालुक्‍यातील शिक्षक संघटनाही आक्रमक झाल्या आहेत.

चिपळूण पंचायत समितीच्या शिक्षण विभागात गेल्या काही दिवसांपासून प्रभारी गटशिक्षणाधिकारी पदाचा खेळखंडोबा सुरू आहे. संबंधित ५ विस्तार अधिकाऱ्यांपैकी एकही जण गटशिक्षणाधिकारी पदाचा कार्यभार स्वीकारण्यास तयार नाही. ऑर्डर निघेल, याची गुप्त माहिती मिळताच अधिकारी रजेवर जाऊ लागले आहेत. चिपळूणात गटशिक्षणाधिकारीच कार्यरत नसल्याने तालुक्‍यातील ११०० शिक्षक कर्मचाऱ्यांचे पगार रखडले आहेत. पगारासाठीचा निधी पंचायत समितीकडे जमा झालाय.

हेही वाचा - निवडणुकीसाठी बैठकांचा धडाका ; राष्ट्रवादीची स्वबळाची मोर्चेबांधणी -

मात्र, शिक्षकांच्या पगार बिलावर गटशिक्षणाधिकाऱ्यांच्या सह्याच होत नसल्याने शिक्षकांच्या खात्यावर वेतन वर्ग करता येत नाही. गट शिक्षणाधिकाऱ्यांच्या खुर्चीच्या खेळखंडोबामुळे फाईलींचा ढिग पडून आहे. येथील शिक्षण विभागाचा डोलारा मोठा आहे. 
दाखले नाहीत, 

शंकाचे निरसन नाही

शिक्षकांना विविध कामकाजासाठी लागणारे दाखलेही रखडले आहेत. तालुक्‍यातून येणाऱ्या ग्रामस्थांच्या शंकाचेही निरसन होत नाही. गट शिक्षणाधिकारीच नसल्याने ग्रामस्थांच्या तक्रारीवर तोडगा काढता येत नाही. काही शाळेत विद्यार्थ्यांचा चांगला पट असूनही शिक्षकांची कमतरता आहे. अशा शाळेवर शिक्षकांची कामगिरी काढण्याची कामेही रखडत आहेत अथवा त्यावर तोडगा निघत नाही. 

हेही वाचा -  भाजपपुढे आता गटतट मिटवण्याचे आव्हान ; निष्ठावंत, जुनेजाणते अजूनही बाहेरच -

"चिपळूण पंचायत समितीच्या शिक्षण विभागात गटशिक्षणाधिकाऱ्यांच्या खुर्चीचा खेळखंडोबा सुरू असल्याने तालुक्‍यातील शिक्षकांना विविध समस्यांना सामोरे जावे लागते आहे. केवळ गट शिक्षणाधिकाऱ्यांच्या पगार बिलावर सह्या झाल्या नसल्याने शिक्षकांची उपासमार सुरू आहे. यासाठी संघटना उद्या सभापती, गटविकास अधिकाऱ्यांची भेट घेणार आहोत. गट शिक्षणाधिकारी पदावर काय तो एकदाचा तोडगा काढा, अशी मागणी करणार आहोत."

- राजेंद्र महाडीक, तालुकाध्यक्ष, प्राथमिक शिक्षक संघ
 

अशी झाली परिस्थिती

•      खात्यावर वेतन वर्ग करणे अडले 
•      शिक्षकांचे विविध दाखलेही रखडले 
•      ग्रामस्थांच्या तक्रारी तोडग्याविनाच
•      शिक्षणविभागात फाईलींचा ढीग पडून

संपादन - स्नेहल कदम