पालघर : वाढवण समुद्रकिनारी नुकताच हवेत उडणारा पाखरू मासा सापडल्याने सध्या त्याचीच चर्चा रंगली आहे. अतिदुर्मिळ असा हा मासा पाहण्यासाठी समुद्रकिनारी गर्दी होत आहे. त्यांच्या काही जाती भारताच्या पूर्व आणि पश्‍चिम किनाऱ्यांजवळ आढळून येतात; पण डहाणू व पालघरमध्ये ते आढळल्याची नोंद यापूर्वी झालेली नाही. म्हणूनच त्याच्याबाबतची उत्सुकता वाढू लागली आहे. 

पाखरू मासा पंखाच्या साहाय्याने पाण्याबाहेर काही वेळ तरंगू शकतो; परंतु तो पक्ष्याप्रमाणे उडू शकत नाही. अस्थिमत्स्य वर्गाच्या बेलॉनिफॉर्मिस गणाच्या एक्‍झॉसिटिडी कुळात त्याचा समावेश होतो. जगभर त्यांच्या ९ प्रजाती व ६४ जाती आहेत. सर्व उष्ण प्रदेशातील समुद्रात ते आढळतात; पण वाढवण समुद्रकिनारी तो प्रथमच आढळला, असे स्थानिक जाणकार सांगतात. ज्यांच्या गळाला "पाखरू'' लागला ते प्रमोद दळवी यांनीही असा मासा कधी सापडला नसल्याचे सांगितले. माशाच्या काही जाती भारताच्या पूर्व आणि पश्‍चिम किनाऱ्यांजवळ आढळून येतात.

संपादन- अर्चना बनगे