ओरोस - बहुचर्चित असलेला राजापूर रिफायनरी प्रकल्प होणारच, अशी माहिती भाजपचे सरचिटणीस तथा माजी खासदार निलेश राणे यांनी पत्रकार परिषदेत दिली. बारसू-सोलगावसह नाणारवासीय सुद्धा रिफायनरी होण्यासाठी सकारात्मक आहेत. याबाबत नाणारवासीयांनी सुद्धा रत्नागिरी जिल्हाधिकारी यांची भेट घेऊन समर्थन असल्याचे सांगून आपल्या जमिनीचे सातबारे त्यांच्याकडे दिलेत. (nilesh rane refinery project latest update)

मुख्य म्हणजे राजापूरचे शिवसेना आमदार राजन साळवी यांनी सुद्धा रिफायनरी होण्यासाठी पुढाकार घेतला आहे. त्यामुळे राजापूर तालुक्‍यातील रिफायनरीला कोणताही विरोध राहिलेला नाही, असे निलेश राणे म्हणाले. राज्य शासनाच्या एमआयडीसी विभागाने केंद्र सरकारला पत्र पाठवत हा प्रकल्प व्हावा, अशी इच्छा व्यक्त केली आहे. त्यामुळे आता या प्रकल्पाला विरोध राहिलेला नाही. काही चिरीमिरी लोक विरोध करीत आहेत; पण त्याला कोण महत्व देत नाहीत, असे यावेळी राणे यांनी सांगितले.

राणे यांनी प्रमोद जठार यांनी नुकतीच केंद्रीय पेट्रोलियम मंत्री पुरी यांची भेट घेतली. येथील वस्तुस्थिती त्यांना सांगितली. त्यामुळे आता केंद्र सरकार रिफायनरी होण्यासाठी पाऊले उचलणार आहे. तसा शब्द पेट्रोलियम मंत्री पुरी यांनी दिला आहे, असेही निलेश राणे म्हणाले आहेत.