रत्नागिरी : ग्राहकांना सर्वोत्तम हापूस आंबा देण्यासाठी कोकणातील दोन हजारपेक्षा अधिक शेतकरी एक्याम ब्रँडखाली एकत्रित येत आहेत. इनोटेरा कंपनीकडून ही पावले उचलण्यात आली असून, पहिल्या टप्प्यात थेट बागांमध्ये जाऊन हापूस खरेदी सुरू झाली. आतापर्यंत दीड हजारहून अधिक पेट्या कंपनीने एक्याम ब्रँडद्वारे महाराष्ट्रासह विविध राज्यांत पोहोचविल्या आहेत.

इनोटेरा कंपनीकडून रत्नागिरी व सिंधुदुर्ग जिल्ह्यांत चाचपणी करण्यात आली होती. बागायतदारांच्या सहकारी शेतकरी सोसायटींना एकाच छताखाली आणण्याचा निर्णय झाला. या शेतकऱ्यांकडील आंबा ‘एक्याम’द्वारे विकला जात आहे. आतापर्यंत दीड हजार पेट्यांची विक्री झाली. महाराष्ट्रातील प्रमुख मुंबई, पुणे शहरांसह दिल्ली, जयपूर, आग्रा, कोलकता या राज्यांतही हापूस पोहोचला आहे. शेतकऱ्यांची कंपनी स्थापन करण्यात येत असून, यात रत्नागिरी, देवगड, पावस, वेंगुर्ला, केळशी आणि इतर भागांमधील को-ऑपरेटिव्ह सोसायटी इनोटेरासोबत भागीदारी करण्यात येत आहे. आंबे गोळा करण्यासाठी वातानुकूलित गाड्यांचा वापर केला जातो.

कोकणातील हापूस आंबा उत्पादकांना एकत्र आणणारी ही भागीदारी ऐतिहासिक आहे. शेतकऱ्यांना त्यांच्या फळांचे शक्य तितके सर्वोत्तम मूल्य मिळविण्यात मदत करण्याच्या या वाटचालीत ब्रँडची सुरुवात हा एक महत्त्वाचा टप्पा आहे.

- मन्सूर काझी, सदस्य, को-ऑपरेटिव्ह सोसायटी, पावस

ग्राहकांना सर्वोत्कृष्ट उत्पादने देण्याची भारतीय शेतकऱ्यांची क्षमता इनोटेरा कंपनी करीत आहे. हापूस उत्पादकांबरोबर भागीदारी करून दर्जेदार हापूस ग्राहकांना दिला जाईल. शेतकऱ्यांच्या सहकार्याने भारतातच नव्हे, तर जगभरात उच्च दर्जाचा हापूस देणार आहोत.

- पास्कल फोएहन, इनोटेरा ग्रुप

विशेष तपशील...

फळांची हाताळणी, ती पिकविण्याचे काम ‘एफएसएसएआय’ने मंजूर केलेल्या प्रक्रियांद्वारेग्राहकांना सर्वोत्तम दर्जाची फळे मिळावीत, यासाठी पॅकेजिंगच्या आधी प्रत्येक फळ स्कॅन केले जाणार ‘एक्याम’मध्ये प्रत्येक फळाला एक क्यूआर कोड दिला जाईल

फळ कोणत्या बागेतून आले आहे, ते ग्राहकांना क्यूआरमधून समजून घेता येणार