सावंतवाडी : जिल्ह्यातील विधानसभा मतदारसंघात आगामी निवडणुकीची चाचपणी सुरू केली आहे. जिल्ह्यातील तिन्ही विधानसभा मतदारसंघ मनसे स्वबळावर लढविणार आहे, असे येथे आयोजित पत्रकार परिषदेत मनसे नेते तथा चित्रपट सेनेचे अध्यक्ष अमेय खोपकर (Amey Khopkar) यांनी सांगितले.

महाराष्ट्र नवनिर्माण सेनेचे अध्यक्ष राज ठाकरे (Raj Thackeray) यांच्यावर केलेली टीका यापुढे खपवून घेणार नाही. अमोल मिटकरींसारखा अजून अन्य कोणी ठाकरेंवर टीका करेल, त्याला मनसैनिक जशास तसे उत्तर देतील, असा इशाराही त्यांनी दिला.

विधानसभा निवडणुकीच्या पार्श्वभूमीवर चाचपणी करण्यासाठी जिल्हा दौऱ्यावर आले असता त्यांनी सावंतवाडीत पत्रकार परिषद घेतली. यावेळी बंटी म्हशीलकर, मनसे जिल्हाध्यक्ष अॅड. अनिल केसरकर, अॅड. राजू कासकर, केतन सावंत आदी मनसैनिक उपस्थित होते. खोपकर म्हणाले, ‘‘राज्यातील राजकीय परिस्थिती बघता मनसे अध्यक्ष राज ठाकरे हा एकमेव आशेचा किरण दिसत आहे. त्यामुळे येथील जनता मनसेनेच्या पाठीशी नक्की उभी राहील. गणेशोत्सवापूर्वी मुंबई-गोवा महामार्गाची परिस्थिती न बदलल्यास मनसेच्या माध्यमातून पुन्हा आंदोलन करून सरकारला जाग आणू.

मी चित्रपटसृष्टीशी संबंधित असल्याने चित्रपटात कोकणातील युवकांना संधी देण्यासाठी प्रयत्नशील आहे. माझ्या दृष्टीने लंडनपेक्षा माझे कोकण सुंदर आहे. केवळ निर्मात्यांना इथे चित्रपटासाठी लागणारी परवानगी मिळेल, त्यांना त्रास होणार नाही, याची काळजी घेतली पाहिजे. मनसे अध्यक्ष राज ठाकरेंवर टीका करायची मिटकरींची योग्यता नाही. आमच्या नेत्यांवर त्यांच्यासारख्यांनी बोलू नये; अन्यथा जशास तसे उत्तर देऊ.’’ यावेळी जिल्हा उपाध्यक्ष सुधीर राऊळ, मनसे तालुकाध्यक्ष मिलिंद सावंत, वेंगुर्ले तालुकाध्यक्ष सनी बावकर, सावंतवाडी तालुका उपाध्यक्ष अतुल केसरकर, आंबोली विभाग अध्यक्ष काशिराम गावडे, बांदा शहराध्यक्ष चिन्मय नाडकर्णी, इन्सुल्ली शाखाध्यक्ष दिनेश मुळीक आदी उपस्थित होते.