चिपळूण (रत्नागिरी) : तिवरे धरणफुटीच्या (Tiware Dam)घटनेला उद्या (ता. २) दोन वर्षे पूर्ण होत आहेत. या दिवशी तिवरे येथे कंटेनरमध्ये राहणाऱ्या दहा कुटुंबांना प्रथम प्राधान्य देत १० घरांचे लोकार्पण केले जाईल. दोन वर्षे कंटेनरमध्ये राहिल्यानंतर ही दहा कुटुंबे हक्काच्या घरात प्रवेश करणार आहेत.tiware-dam-accident-rightful-family-homes-today-kokan-news

मुख्यमंत्री उद्धव ठाकरे (Chief Minister Uddhav Thackeray)यांच्या हस्ते ऑनलाईन कळ दाबून या घराचे लोकार्पण केले जाणार आहे; मात्र गृहप्रवेशाच्यावेळी शिवसेना नेते आदेश बांदेकर, खासदार विनायक राऊत, मंत्री उदय सामंत आणि आमदार शेखर निकम आदी उपस्थित राहणार आहेत. तिवरे धरणफुटीच्या घटनेत तब्बल ५४ कुटुंबे बाधित झाली. या कुटुबांसाठी अलोरे येथे पुनर्वसनाअंतर्गत घरे उभारण्यात आली आहेत. पहिल्या टप्प्यात २४ घरे उभारली असून त्यातील काही घरांचे काम अंतिम टप्प्यात आहे. २ वर्षे कंटेनरमध्ये राहणाऱ्या कुटुंबीयांना प्राधान्याने घरे उपलब्ध करून देण्याच्या उद्देशाने ही सोडत काढण्यात आली.

पहिल्या टप्प्यात १० घरांसाठी सोडत काढण्यात आली तर उर्वरित १४ घरांसाठी येत्या काही दिवसांतच सोडत काढली जाणार आहे. १० घरांचे लोकार्पणावेळी जिल्हाधिकारी लक्ष्मीनारायण मिश्रा, अप्पर जिल्हाधिकारी संजय शिंदे, प्रांताधिकारी प्रवीण पवार, तहसीलदार जयराज सूर्यवंशी, जिल्हा परिषद सदस्य, विनोद झगडे आदी उपस्थित राहणार आहेत.

हेही वाचा- कृष्णाकाठी भोसले गटच ठरला बाहुबली!

उन्हाळ्यात कंटेनर होते तापत

धरणफुटीच्या घटनेत ज्यांची घरे वाहून गेली त्यांना राहण्यासाठी काहीच पर्याय नव्हता. अशा कुटुंबांसाठी शासनाकडून कंटेनरची व्यवस्था करण्यात आली. उन्हाळ्यात कंटेनर तापत असल्यामुळे त्यात राहणे सोयीचे नव्हते. पर्याय नसल्यामुळे धरणग्रस्तांनी दोन वर्ष या कंटेनरमध्ये हलाखीचे दिवस काढले अखेर शुक्रवारी त्यांना हक्काची घरे उपलब्ध होणार आहेत.