फोटोसंक्षिप्त
87972

बांदा नाबर प्रशालेत
महिलादिन उत्साहात
बांदा ः श्री मंगेश रघुनाथ कामत चॅरिटेबल ट्रस्ट मुंबईच्या येथील व्ही. एन. नाबर मेमोरियल इंग्लिश मीडियम प्रशालेत जागतिक महिला दिन उत्साहात साजरा करण्यात आला. यावेळी पहिल्या महिला शिक्षिका सावित्रीबाई फुले, मदर तेरेसा, इंदिरा गांधी यांच्या प्रतिमेचे पूजन केले. मुख्याध्यापिका मनाली देसाई यांनी दीपप्रज्वलनाने कार्यक्रमाची सुरुवात केली. प्रशालेच्या विद्यार्थिनी कृपा वारंग, श्रेया हळदणकर यांनी महिला दिनानिमित्त विचार व्यक्त केले. विद्यार्थिनींनी सावित्रीबाई फुले, जिजामाता, मदर तेरेसा, अॅनी बेझंट, आनंदीबाई जोशी, लता मंगेशकर, प्रतिभा पाटील, सानिया मिर्झा यांसारख्या कर्तृत्ववान स्त्रियांच्या वेशभूषा केल्या व त्यांच्याविषयी माहिती सादर केली. कार्यक्रमाच्या यशस्वीतेसाठी सांस्कृतिक विभाग प्रमुख अनिशा रॉड्रिक्स यांनी विशेष मेहनत घेतली. यावेळी प्रशाळेतील शिक्षिका व शिक्षकेतर महिला कर्मचारी उपस्थित होत्या.

केसरी, देवसूत फुलशेतीचे
गव्यारेड्यांकडून नुकसान
ओटवणे ः सावंतवाडी तालुक्यातील केसरीसह देवसू येथे लिलीची फुलशेती गव्यांच्या कळपाने फस्त केल्यामुळे शेतकऱ्यांचे नुकसान झाले. हाता-तोंडाशी आलेल्या या फुलशेतीला गव्यांच्या कळपाने लक्ष्य केल्यामुळे शेतकऱ्यांची झोप उडाली आहे. देवसू परिसरात लिलीची फुलशेती मोठ्या प्रमाणात करण्यात येते. यातून अनेकांना रोजगार उपलब्ध झाला आहे. केसरी-धनगरवाडीनजीक पुरुषोत्तम परांजपे तसेच देवसू-खालचीवाडी येथील समीर शिंदे यांच्या लिलीच्या फुलशेतीचे गव्यांच्या कळपाने अतोनात नुकसान केले. या भागात इतर शेतकऱ्यांचीही फुलशेती आहे. गव्यांच्या उपद्रवामुळे शेतकऱ्यांमध्ये भीतीचे वातावरण आहे. या नुकसानीबाबत शेतकऱ्यांनी आंबोली वन विभागाच्या वनक्षेत्रपाल कल्पना घोडके, देवसू वनपरिमंडळाचे वनपाल सदानंद परब यांचे लक्ष वेधून नुकसान भरपाईची मागणी केली. उर्वरित फुलशेतीची हानी टाळण्यासाठी गव्यांचा बंदोबस्त करावा, अशी मागणी केली.