अपघात प्रकरणी साडेचार हजाराचा दंड

रत्नागिरी, ता. १७ ः तालुक्यातील पावस ते पूर्णगड रस्त्यावर पानगलेवाडी येथे मोटारचालकाने डंपरला धडक दिली होती. या अपघातातील चालकाला ग्रामन्यायालय पालीच्या पिठासीन अधिकारी पी. एस. गोवेकर यांनी ४ हजार ५०० रुपये दंड सुनावला. ही घटना ७ जून २०१९ ला सायंकाळी चारच्या सुमारास पावस ते पूर्णगड जाणाऱ्या बायपास रस्त्यावरील पानगलेवाडी येथे घडली होती. संदीप रमेश गावडे (वय ४०, रा. पूर्व मुंबई) असे दंड सुनावण्यात आलेल्या चालकाचे नाव आहे. या प्रकरणाचा तपास सहाय्यक पोलिस निरीक्षक विजय जाधव यांनी करून न्यायालयात दोषारोपपत्र दाखल केले होते. गुरुवारी (ता. १६) या खटल्याचा निकाल झाला. सरकारी पक्षातर्फे सहाय्यक सरकारी अभियोक्ता अॅड. एन. बी. नाचणकर यांनी काम पाहिले. या खटल्यात पैरवी अधिकारी म्हणून सहाय्यक पोलिस निरीक्षक दिनकर सूर्य, पोलिस हवालदार देऊस्कर, मुरकर यांनी काम पाहिले आहे.