सफाई कामगारांचे मानधन
थकले; आजपासून काम बंद

दोडामार्ग नगरपंचायत प्रशासनाला निवेदन

दोडामार्ग, ता. १७ ः कसई-दोडामार्ग नगरपंचायतच्या सफाई कर्मचारी व नळ कामगारांचे दोन महिन्यांचे मानधन थकले आहे. त्यामुळे उद्यापासून (ता.१८) बेमुदत काम बंद करणार असल्याचा इशारा कर्मचाऱ्यांनी नगराध्यक्ष आणि मुख्याधिकारी यांना निवेदनाद्वारे दिला आहे.
निवेदनात पुढे म्हटले आहे की, येथील नगरपंचायतचे सर्व सफाई कर्मचारी व नळ कामगार यांना फेब्रुवारी व मार्चपर्यंतचे मानधन मिळालेले नाही. दोन महिन्यांपासून नगरपंचायत कार्यालयात वारंवार पाठपुरावा करण्यात आला; मात्र नगरपंचायतीकडून त्याची कोणतीही दखल घेण्यात आलेली नाही. मानधन न मिळाल्यामुळे कर्मचाऱ्यांवर उपासमारीची वेळ आली आहे. कर्मचाऱ्यांचे मानधन न मिळाल्यास बेमुदत काम बंद करणार असल्याचा इशारा या कर्मचाऱ्यांनी निवेदनाद्वारे दिला. तसे निवेदन रामदास शेळके, बाबू ताटे, सोमनाथ वरक, अरुण चव्हाण, अंकुश कदम, सुनील आरोसकर व मंदार चव्हाण यांनी दिले आहे.
----------
चौकट
नगरसेवक नानचेंनी वेधले लक्ष
नगरपंचायतीत कार्यरत असलेले सफाई व नळ कामगार अत्यंत चांगले काम करीत आहेत. दोडामार्ग शहर स्वच्छ व सुंदर ठेवण्यासाठी चाललेले प्रयत्न यशस्वी ठरत आहेत; परंतु, शहर सुंदर राहण्यासाठी दिवस-रात्र राबणाऱ्या हातांवर मात्र वेळेत वेतन मिळत नाही. रोज सफाई करणाऱ्यांना तीन-चार महिने वेतन मिळत नाही. ही नगरपंचायतसाठी अशोभनीय गोष्ट आहे. कामगारांच्या घरची परिस्थिती बेताची असल्याने जीवितार्थ जलविणे मुश्किलीचे होत आहे. त्यामुळे कामगारांचे थकीत वेतन ताबडतोब अदा करावे. तसेच यापुढेही त्यांचे वेतन वेळेवर द्यावे, अशी मागणी माजी नगराध्यक्ष तथा नगरसेवक संतोष नानचे यांनी मुख्याधिकाऱ्यांकडे केली आहे.