रिफायनरीबाबत आज राजापुरात बैठक
राजापूर, ता. २९ ः प्रस्तावित बारसू रिफायनरी प्रकल्पाच्या अनुषंगाने शंका आणि प्रश्‍नांचे निरसन करण्यासाठी लोकांशी संवाद साधण्यात येणार असल्याचे पालकमंत्री उदय सामंत यांनी आज स्पष्ट केले. त्याप्रमाणे प्रशासनाकडून लोकांशी संवाद साधण्याला सुरवात झाली असून रविवारी (ता. ३०) धोपेश्‍वर आणि बारसू येथील शेतकरी, ग्रामस्थ आणि प्रकल्पविरोधकांशी संवाद साधण्यासाठी प्रशासनाकडून बैठकीचे आयोजन करण्यात आले आहे. सायंकाळी ४ वा. नगर पालिकेच्या छत्रपती शिवाजी महाराज नाट्यगृहामध्ये ही बैठक होणार आहे. जिल्हाधिकारी देवेंदर सिंग आणि जिल्हा पोलिस अधीक्षक धनंजय कुळकर्णी उपस्थित राहणार असल्याची माहिती प्रांताधिकारी वैशाली माने यांनी दिली. बैठकीला जास्तीस जास्त लोकांनी उपस्थित राहावे, असे आवाहन प्रांताधिकारी वैशाली माने यांनी केले आहे.