उष्म्यामुळे दूध उत्पादनात ४० टक्केने घट
दाभोळ, ता. २७ः सध्या कोकणात कडक उन्हामुळे दूध उत्पादनात तब्बल ४० टक्के घट झाली आहे. यामुळे कोकणात या जोड व्यवसायावर अवलंबून असणारा शेतकरी आर्थिक संकटात सापडला आहे. मिनी महाबळेश्वर म्हणून प्रसिद्ध असणाऱ्या दापोलीचे तापमान काहिलीपर्यंत जाऊन पोहोचले आहे. यामुळे मनुष्यप्राण्यांसह प्राणिमात्रांनादेखील याच्या झळा जाणवत आहेत. उष्म्यामुळे दूध उत्पादनातदेखील ४० टक्क्यांपर्यंत घट झाल्याची माहिती दूध उत्पादक व्यावसायिकांनी दिली.
दापोलीत अनेकांचा दुधाचा जोडधंदा आहे. दर उन्हाळ्यामध्ये जनावरांच्या दूध उत्पादनात कमालीची घट होते. त्यामुळे ज्यांना अतिरिक्त दुधाची गरज असते अशांना दूध देणे बंद करण्यात येते. जे नेहमीचे उकाडे आहेत, अशांनाच दूध विक्री सुरू ठेवता येते. दूध उत्पादनात घट झाल्यामुळे मोठा आर्थिक फटका बसतो. घटीचे प्रमाण कमी करण्याकरिता काही ठिकाणी म्हशींवर गार पाण्याचे फवारे मारण्यात येतात, तर काहीजण गोठ्यात २४ तास पंखे लावतात. गोठ्यांवर पेंढा टाकून उकाडा कमी केला जातो.