जिल्ह्यात ६ हजार ३०० टन खत उपलब्ध
सोसायटींमार्फत वितरण; पाऊस लांबल्याने पेरण्या रखडल्या
रत्नागिरी, ता. १६ ः खरीप हंगामात जिल्ह्यात शेतकऱ्यांना वेळेत खतपुरवठा करण्यासाठी जिल्हा परिषद कृषी विभाग प्रयत्न करत आहे. जिल्ह्याला मंजूर सुमारे १२ हजार मेट्रिक टन खतसाठ्यापैकी ६ हजार ३०० मेट्रिक टन खत शासनाकडून उपलब्ध झाले आहे. ते जिल्ह्यातील विकास सहकारी सोसायटींच्या माध्यमातून शेतकऱ्यांना दिले जात आहे.
जिल्ह्यातील एकूण खरीप पिकाखालील क्षेत्र सुमारे ८१ हजार ९९५ हेक्टर आहे. खरीप भातपिकाखालील क्षेत्र सुमारे ६८ हजार हेक्टर, नागली क्षेत्र सुमारे १० हजार २३६ हेक्टर एवढे आहे. यावर्षी २०२३-२४ च्या खरीप हंगामासाठी २१ हजार मेट्रिक टन खताची मागणी करण्यात आली होती. त्यापैकी सुमारे १२ हजार ७४० मेट्रिक टन खत मंजूर झाले आहे. खरीप काळात जिल्ह्यातील शेतकऱ्यांना वेळेत खतपुरवठा होण्यासाठी जिल्हा कृषी विभागाकडून खबरदारी घेण्यात आली आहे. अजूनही पावसाला सुरवात झालेली नाही. त्यामुळे शेतीची कामे रखडली. तरीही भविष्यात खताची अडचण होऊ नये यासाठी शेतकरी खत विकत घेत आहे. आतापर्यंत रेल्वेच्या तीन रेकद्वारे टप्प्याटप्याने खत दाखल झाले. मंजूर खताच्या तुलनेत ४० टक्के खत प्राप्त झाले. हे खत प्रत्येक सोसायटीला समान वाटप करण्यात आले. तरीही अजून शेतकऱ्यांना खत पुरवठा झालेला नाही. जून महिन्यात येणारा अपेक्षित साठा जिल्ह्याला प्राप्त झाला आहे. येत्या चार दिवसात अजून एक मोठी खताची रेक दाखल होणार आहे. त्यामधून सुमारे दीड हजार मेट्रिक टन खत जिल्ह्याला मिळेल, असे कृषी विभागाकडून सांगण्यात आले. दरम्यान, प्रत्येक वर्षी खरीप हंगामाच्या तोंडावर खतटंचाईला सामोरे जावे लागते. युरिया व डीएपीचा बफर स्टॉक करण्यावर भर दिला आहे. खतांची कमतरता खरोखरच भासू लागल्यास हा बफर स्टॉक खुला केला जाणार आहे.

कोट
शेतकऱ्यांना कृषी निविष्ठा विक्रेत्यांकडून विक्री होणाऱ्या बियाणे, खते, कीटकनाशकांचा दर्जा, भेसळ यांची तपासणी केली जाते. निविष्ठांची अनधिकृत साठवणूक करून कृत्रिम टंचाई निर्माण करण्यावर नियंत्रण ठेवण्यासाठी तालुका कार्यक्षेत्रात भरारी पथकं स्थापना केली आहेत. तसेच जिल्हास्तरावर तक्रार निवारण समिती कार्यरत आहे.
- अजय शेंडे, कृषी विकास अधिकारी