14761
कुडाळ ः वनमहोत्सव उपक्रमात सहभागी विद्यार्थी.

कुडाळात विद्यार्थ्यांतर्फे वनमहोत्सव
कुडाळ ः कराची महाराष्ट्रीय शिक्षण प्रसारक मंडळाच्या इंग्रजी माध्यमाच्या पूर्व प्राथमिक व प्राथमिक शाळेत १ ते ७ जुलै दरम्यान वनमहोत्सव झाला. यानिमित्त विद्यार्थ्यांनी विविध कार्यक्रमांचे सादरीकरण केले. ‘वृक्षांचे महत्त्व’ यावर विद्यार्थ्यांनी नृत्य सादर केले. शिक्षकांनी मुलांना वृक्ष लागवडीबाबत माहिती दिली व वृक्षारोपणासाठी प्रोत्साहित केले. यानिमित्त चित्रकला, घोषवाक्य व वृक्षांचे महत्त्व सांगणाऱ्या स्वरचित कवितांचेही सादरीकरण करण्यात आले. विद्यार्थी व शिक्षकांकडून शालेय परिसरात वृक्षारोपण करण्यात आले. या उपक्रमास विद्यार्थी व शिक्षकांचे मोलाचे सहकार्य लाभले, अशी माहिती शाळेच्या मुख्याध्यापिका मुमताज शेख यांनी दिली.
................
‘तिलारी पाटबंधारे’ अभियंतापदी जाधव
सावंतवाडी ः सिंधुदुर्ग पाटबंधारे प्रकल्प बांधकाम तिलारी-चराठेचे कार्यकारी अभियंता म्हणून विनायक जाधव यांनी पदभार स्वीकारला. तर रोहित कोरे यांची सांगली येथे बदली झाली आहे. सिंधुदुर्ग पाटबंधारे प्रकल्प बांधकाम कार्यकारी अभियंता कोरे यांची ताकारी म्हैसाळ उपसा सिंचन प्रकल्प, सांगली येथे त्याच पदावर बदली झाली आहे. तर अलोरे-रत्नागिरी येथे गुण नियंत्रण कार्यकारी अभियंता म्हणून पदभार सांभाळणारे जाधव यांनी सिंधुदुर्ग पाटबंधारे प्रकल्प बांधकाम कार्यकारी अभियंता म्हणून पदभार स्वीकारला आहे. त्यांनी पूर्वी तिलारी आंतरराज्य जलविद्युत प्रकल्पात कोनाळकट्टा येथे काम केले आहे.