पान ४

महिला, मुलींसाठी
मोफत आरोग्य तपासणी
रत्नागिरी, ता. ३ ः जागतिक महिला दिनानिमित्त ८ मार्च रोजी पाली येथील डी. जे. सामंत महाविद्यालय, रत्नागिरी एमआयडीसीमधील नवनिर्माण शिक्षण संस्था, कसोप- फणसोप येथील श्री लक्ष्मी केशव माध्यमिक विद्यालय, प्राथमिक आरोग्य केंद्र कोतवडे, प्राथमिक आरोग्य केंद्र खंडाळा आणि संगमेश्वर तालुक्यातील नवनिर्माण शिक्षण संस्था नावडी या सहा ठिकाणी महिला व मुलींसाठी मोफत आरोग्य तपासणी व उपचार शिबिर आयोजित करण्यात येत आहे. या आरोग्य शिबिराचा मुली व महिलांनी लाभ घ्यावा, असे आवाहन पालकमंत्री उदय सामंत यांनी केले.
शिबिराच्या नियोजनबाबत पालकमंत्री सामंत यांनी घेतलेल्या बैठकीला जिल्हा शल्यचिकित्सक डॉ. भास्कर जगताप, जिल्हा आरोग्य अधिकारी डॉ. अनिरुद्ध आठल्ये, जिल्हा नियोजन अधिकारी सत्यविनायक मुळे आदी उपस्थित होते. शिबिरामध्ये इसीजी, सर्व रक्त तपासण्या, अस्थिरोगतज्‍ज्ञ, तपासणी व गरजेनुसार शस्त्रक्रिया, स्त्रीरोगतज्‍ज्ञ तपासणी, नेत्र तपासणी, मोतिबिंदू शस्त्रक्रिया तसेच मोफत चष्मे देण्यात येणार आहे. प्री कॅन्सर डिटेक्शन युनिट रत्नागिरीत पहिल्यांदाच आणले जात आहे. या शिबिराचा लाभ घ्यावा, असे आवाहन पालकमंत्री सामंत यांनी केले आहे.