70371
दीपक केसरकर
काजू बोंडू, टसरसाठी ७५ टक्के अनुदान

दीपक केसरकर ः सावंतवाडीत उद्या मार्गदर्शन मेळावा

सकाळ वृत्तसेवा
सावंतवाडी, ता. १० ः शासनाच्या ‘सिंधूरत्न’ योजनेतून जिल्ह्यातील शेतकऱ्यांसाठी काजू बोंडू प्रक्रिया आणि टसर रेशीम उद्योग यासाठी ७५ टक्के अनुदान देण्यात येणार आहे. या योजनेनुसार शेतकऱ्यांना मार्गदर्शन आणि तांत्रिक माहिती देण्यासाठी कोकण कृषी विद्यापीठातील तज्ज्ञांकडून मार्गदर्शन मेळावे आयोजित केले असून, या योजनेचा जिल्ह्यातील जास्तीत जास्त शेतकऱ्यांनी लाभ घ्यावा, असे आवाहन शालेय शिक्षणमंत्री दीपक केसरकर यांनी केले. या शेतकरी मेळाव्याला श्री. केसरकर आणि कृषी विद्यापीठांच्या तज्ज्ञांची मार्गदर्शनपर व्याख्याने होणार आहेत.
जिल्ह्यात मोठ्या प्रमाणावर काजू लागवड होत आहे. परंतु, बोंडूवरील प्रक्रियेचे उद्योग नसल्याने बोंडू फेकून दिले जातात. या बोंडूवर प्रक्रिया करून त्याद्वारे आर्थिक उत्पन्न मिळवण्याच्या दृष्टीने काजू बोंडू प्रक्रिया उद्योगाचे मार्गदर्शन आणि यंत्रसामग्री देण्यात येणार आहे. काजू बोंडूप्रमाणे जिल्ह्यात आईन वृक्षावर टसर रेशीम निर्मिती प्रकल्पास पोषक वातावरण आहे. जिल्ह्यात टसर रेशीम उद्योग प्रकल्प चांगले यशस्वी होऊ शकतात, या दृष्टीने शेतकऱ्यांना मार्गदर्शन करण्यात येणार आहे. या दोन्ही उद्योगांना ७५ टक्के अनुदान सिंधूरत्न योजनेतून देण्यात येणार असून, मंगळवारी (ता.१२) दुपारी अकरा वाजता येथील बॅरिस्टर नाथ पै सभागृहात इच्छुक शेतकऱ्यांचा मेळावा आयोजित केला आहे. काजू बोंडू प्रक्रिया उद्योगाबाबत डॉ. बाळासाहेब सावंत कोकण कृषी विद्यापीठाचे तज्ज्ञ शास्त्रज्ञ या मेळाव्याला मार्गदर्शन करणार आहेत. जिल्ह्यातील बचतगटांना तसेच आईन उत्पादन करू इच्छिणाऱ्यांना मार्गदर्शन करण्यासाठी वनविभागाचे उपवनसंरक्षक, वरिष्ठ अधिकारी तसेच तज्ज्ञ रेशीम निर्मिती तज्ज्ञ योगेश फोंडे हे मार्गदर्शन करणार आहेत. शेतकऱ्यांनी मेळाव्यास येताना आधारकार्ड, काजू लागवडीचे सातबारा, किसान कार्ड, बँक पासबुक झेरॉक्स आदी कागदपत्रांच्या सत्यप्रती सोबत आणाव्यात. काजू बोंडू प्रक्रिया उत्पादनाला कोकण कृषी विद्यापीठामार्फत बाजारपेठ मिळवून देण्यात येणार आहे. कोकण कृषी विद्यापीठ आणि जिल्हा कृषी खाते या योजनेचे सहयोगी यंत्रणा आहेत.’’