१७ (पान ३ साठी)

नकली दागिने प्रकरणी तिघांवर गुन्हा

१८ लाख २१ हजारांची फसवणूक ; बँकेची तक्रार

सकाळ वृत्तसेवा
पावस, ता. २१ ः नकली दागिने गहाण ठेऊन कर्ज काढून बॅंका, पतसंस्थांची फसवणूक केल्याप्रकरणी तीन संशयितांविरुद्ध पहिला गुन्हा पूर्णगड पोलिस ठाण्यात दाखल झाला. संशयितंनी ४४४.३०० वजनाचे बनावट दागिने गहाण ठेवले. त्याद्वारे १८ लाख २१ हजार कर्ज उचलून बॅंक ऑफ इंडियाची फसवणूक केल्याचा गुन्हा दाखल करून अटक करण्यात आली आहे.
अमेय सुधीर पाथरे (वय ३४, रा. खांबडवाडी, पावस), अमोल गणपती पोतदार (४७), प्रभात गजानन नार्वेकर (३२, दोन्ही रा. कोल्हापूर) या तीन संशयितांवर गुन्हा दाखल आहे. या तिघानी संगनमताने बॅंकेत ४४४.३०० वजनाचे १३ चैन व २ ब्रेसलेट असे बनावट दागिने गहाण ठेवले. त्याद्वारे १८ लाख २१ हजार कर्ज उचलले. स्थानिक गुन्हे शाखेने नुकताच एका घरफोडीचा तपास करताना हे प्रकरण पुढे आल्याचे तक्रारीत म्हटले आहे. त्यानंतर हा प्रकार बॅंकेच्या लक्षात आला. बँकेने पूर्णगड सागरी पोलिस ठाण्यामध्ये संशयितांविरुद्ध तक्रार दाखल केली आहे. पोलिसांनी या तिघांवर गुन्हा दाखल करून अटक केली आहे. त्यांना लवकरच न्यायालयात हजर करण्यात येणार आहे. अनेक पतसंस्था आणि बॅंकांमध्ये त्यांनी नकली दागिने ठेऊन तारण कर्ज प्रकरणे केली आहेत.