88655

मळगाव, इन्सुली घाटीतील धोकादायक झाडे तोडणार

प्रांताधिकाऱ्यांची माहिती ः ‘सामाजिक बांधिलकी’ने वेधले होते लक्ष

सकाळ वृत्तसेवा
सावंतवाडी, ता. ७ ः सावंतवाडी शहरासह मळगाव, इन्सुली घाटी व सावंतवाडी ते झाराप महामार्गाच्या बाजूला असलेली धोकादायक झाडे येत्या काही दिवसातच तोडण्यात येणार असून शहरातील धोकादायक झाडे प्रशासनाकडून तोडण्यात आली असल्याची माहिती प्रांताधिकारी हेमंत निकम यांनी आज दिली. या समस्येबाबत सामाजिक बांधिलकी प्रतिष्ठानतर्फे पाठपुरावा केला होता.
सामाजिक बांधिलकी प्रतिष्ठानच्या माध्यमातून शहरातील तसेच सावंतवाडी-झाराप महामार्ग, इन्सुली व मळगाव घाटी येथील रस्त्यावरील धोकादायक झाडे तोडण्याकरिता प्रांताधिकारी व वन विभाग अधिकाऱ्यांना निवेदन दिले होते. शहरातील रस्त्याच्या बाजूला जीर्ण झालेली झाडे, रस्त्यावर झुकलेल्या झाडांच्या धोकादायक फांद्या तात्काळ तोडाव्यात, अशी मागणी निवेदनाद्वारे करण्यात आली होती. आपत्कालीन परिस्थितीमध्ये सामाजिक बांधिलकीतर्फे पूर्णपणे सहकार्य करण्यात येईल, असेही आश्वासन दिले होते. सामाजिक बांधिलकीच्या मागणीची दखल घेऊन प्रशासनाने पावसाआधीच शहरातील धोकादायक झाडे तोडण्यास सुरुवात केली आहे. तसेच दोन्ही घाटीतील व सावंतवाडी ते झाराप रस्त्याच्या बाजूला असलेली
धोकादायक झाडे येत्या काही दिवसात तोडण्यात येतील, अशी माहिती प्रांताधिकारी निकम यांनी सामाजिक बांधिलकीच्या पदाधिकाऱ्यांना आज दिली. याबद्दल प्रतिष्ठानतर्फे अधिकाऱ्यांचे आभार मानले. यावेळी सामाजिक बांधिलकीचे अध्यक्ष सतीश बागवे, उपाध्यक्ष शैलेश नाईक, सचिव समीरा खालील व रवी जाधव उपस्थित होते.