खेड नगरपालिकेकडून
७३ जणांना नोटीस
धोकादायक बांधकाम; परवानगी घेऊनच बांधकाम करण्याच्या सूचना
सकाळ वृत्तसेवा
खेड, ता. २ः शहरातील महाडनाका येथील धोकादायक स्थितीतील रिकामी खासगी चाळीचा काही भाग मंगळवारी सायंकाळच्या सुमारास अचानक कोसळल्यानंतर धोकादायक बांधकामाचा प्रश्न ऐरणीवर आला आहे. नगरप्रशासनाने यापूर्वीच शहरातील धोकादायक बांधकाम असणाऱ्यांना ७३ जणांना नोटीस बजावल्या आहेत. नगरपालिकेची रितसर परवानगी घेऊन धोकादायक ठिकाणांचे बांधकाम करण्याच्या सूचना देण्यात आल्या आहेत.
नैसर्गिक आपत्तीवर मात करण्याच्यादृष्टीने प्रभारी मुख्याधिकारी चेतन विसपुते, प्रशासकीय अधिकारी नागेश बोंडले यांच्या मार्गदर्शनाखाली सज्जता ठेवली आहे. विशेषत: पूरप्रवण क्षेत्रावर करडी नजर ठेवण्यात आली असून, कर्मचाऱ्यांसह मदतकर्त्यांना सतर्कतेच्या सूचनाही देण्यात आल्या आहेत. महाडनाका येथील खासगी रिकामी चाळ कोसळल्यानंतर धोकादायक बांधकामांचा प्रश्न ऐरणीवर आला आहे; मात्र महाडनाका येथील धोकादायक स्थितीतील रिकामी चाळ खाली करण्यासाठी संबंधित मालकास पालिकेने यापूर्वीच नोटीस बजावली होती तसेच शहरातील विविध भागातील धोकादायक बांधकाम असणाऱ्या ७३ जणांनाही नोटीस बजावल्या होत्या. यातील काहींनी नोटिशीला सकारात्मक प्रतिसाद देत रितसर परवानगी घेऊन बांधकामेही केली आहेत; मात्र काहीजणांनी नोटिशीला केराची टोपली दाखवल्याचे समोर आले आहे.