पाट-मतकरीवाडीत रस्त्याला
पावसामुळे तळ्याचे स्वरूप

सकाळ वृत्तसेवा
म्हापण, ता. २ ः पाट-मतकरीवाडी येथील पाट-वेंगुर्ले या सागरी महामार्गावरून प्रवास करताना चालकांना जीव मुठीत घेऊन वाहने हाकावी लागत आहेत. या सागरी महामार्गाला पावसामुळे तळ्याचे स्वरूप प्राप्त झाले आहे. याकडे बांधकाम विभागाचे लक्ष वेधूनही कोणतीही कार्यवाही केली नसल्याने चालकांतून संताप व्यक्त करण्यात येत आहे.
काही दिवसांपूर्वी बांधकामकड़ून पाट-मतकरीवाडी येथील सागरी महामार्गालगत चुकीच्या पद्धतीने गटाराची खोदाई केली होती. त्यामुळे चालकांना कसरत करावी लागत होती. ही बाब निदर्शनास आणून देण्यात आली; मात्र यावर कोणत्याही प्रकारची उपाययोजना केलेली नाही. त्यामुळे सध्या या महामार्गावर पावसाचे पाणी साचून तळ्याचे स्वरूप प्राप्त झाले आहे. साचलेल्या पाण्यामुळे महामार्गाची एक बाजू पूर्णपणे बंद झाली आहे. रस्त्याच्या एका बाजूने ये-जा करावी लागत असून, यामुळे अपघाताची भीती व्यक्त होत आहे. अपघात झाल्यास जबाबदार कोण, असा संतप्त सवाल चालक व ग्रामस्थांनी केला असून, याबाबत तातडीने उपायोजना करण्याची मागणी केली जात आहे.
94388