07328

आठ महिन्यांपूर्वीचा पुतळा
कोसळतो हे दुर्दैवी ः भोसले

चौकशी करा; दोषींवर कारवाई करा

सकाळ वृत्तसेवा
कणकवली, ता. २७ : मालवण-राजकोट येथे अवघ्या आठ महिन्यांपूर्वीच उभारलेला छत्रपती शिवाजी महाराजांचा पूर्णाकृती पुतळा कोसळला, ही दुर्दैवी बाब आहे. याबाबत संबंधित शासकीय विभागाने योग्य चौकशी करून कुणी दोषी असल्यास कारवाई करावी, अशी मागणी शिवजयंती उत्सव समिती कणकवलीचे अध्यक्ष प्रताप भोसले यांनी केली आहे.
श्री. भोसले यांनी प्रसिद्धीस दिलेल्या पत्रकात म्हटले आहे की, नौसेना दिनानिमित्त छत्रपती शिवाजी महाराजांच्या कार्याचे स्मरण होण्यासाठी राजकोट किल्ल्यावर महाराजांचा पुतळा उभारण्यात आला, ही शिवप्रेमींसाठी नक्कीच आनंदाची, अभिमानाची बाब होती. मात्र, अवघ्या आठ महिन्यांमध्ये हा पुतळा कोसळल्याने त्याच्या दर्जाविषयी शिवप्रेमींमध्ये प्रश्नचिन्ह निर्माण होत आहे. त्यामुळे घडल्या प्रकाराची काटेकोरपणे चौकशी व्हायलाच हवी. शिवाजी महाराजांसह अनेक महापुरुषांची जिल्ह्यात ठिकठिकाणी स्मारके आहेत. एखादी घटना घडल्यानंतर सतर्कता दाखविण्यापेक्षा सद्यास्थितीत जिल्ह्यात असणारी महापुरुषांची सर्व स्मारके सुस्थितीत आहेत का, याचीही तपासणी संबंधित शासकीय विभागांनी करावी. तसेच यापुढे कोणत्याही महापुरुषाचे स्मारक उभारताना दर्जा, जागा आदींसह तांत्रिक बाबींचीही तपासणी करावी.’’