राजकोटमधील दुर्घटनेचा
नौदल बनविणार अहवाल

अधिकाऱ्यांकडून पाहणी; केसरकरांशी चर्चा

सकाळ वृत्तसेवा
मालवण, ता. २७ : राजकोट येथील छत्रपती शिवाजी महाराजांचा पुतळा कोसळल्यानंतर सरकारसह सर्वच प्रशासकीय यंत्रणा हादरली आहे. हा पुतळा उभारण्यात भारतीय नौदलाने पुढाकार घेतला असल्याने नौदलाच्या भूमिकेकडे सर्वांचे लक्ष लागले असतानाच आज सकाळी त्यांच्या अधिकाऱ्यांनी राजकोट येथे येत कोसळलेल्या पुतळ्याची पाहणी केली. याबाबत लवकरच एक स्वतंत्र अहवाल तयार करण्यात येणार असून, हा अहवाल नौदलाच्या वरिष्ठ अधिकाऱ्यांकडे सोपविण्यात येणार असल्याचे यावेळी स्पष्ट करण्यात आले.
नौदल दिनाच्या निमित्ताने भारतीय आरमाराचे जनक असलेल्या छत्रपती शिवाजी महाराजांचा पूर्णाकृती पुतळा मालवण येथे उभारण्यात यावा, अशी भारतीय नौदलाची योजना होती. या योजनेनुसार महाराष्ट्र शासनाच्या सहकार्याने नौदलाने सिंधुदुर्ग किल्ल्यानजीक राजकोट येथे तब्बल पाच कोटी रुपये खर्चून राजकोट किल्ल्याची डागडुजी केली आणि त्यात १५ फूट उंच चबुतऱ्यावर २८ फूट उंचीचा ब्राँझ धातूचा पुतळा उभारण्यात आला. हा पुतळा उभारण्यासाठी शिल्पकार जयदीप आपटे आणि बांधकाम सल्लागार डॉ. चेतन पाटील यांची नेमणूक करण्यात आली होती.
पुतळा उभारण्याच्या कामात शासनाशी समन्वयक म्हणून लेफ्टनंट कमांडर अक्षय पाटील व कमांडर सुशील कुमार राय यांनी काम पाहिले होते. याच अधिकाऱ्यांनी आज राजकोट येथे येत कोसळलेल्या पुतळ्याची पाहणी केली. या पाहणीची माध्यमांपासून गुप्तता पाळण्यात आली होती. राजकोट येथील कोसळलेल्या शिवपुतळ्याची पाहणी केल्यानंतर नौदल अधिकाऱ्यांनी तहसील कार्यालय येथे मंत्री दीपक केसरकर यांच्याशी एकंदरीत परिस्थितीबाबत बंद दाराआड चर्चा केली. या चर्चेचा तपशील मात्र समजू शकलेला नाही. घटनेच्या पाहणीअंती वरिष्ठांना त्याबाबत अहवाल सादर करण्यात येणार असल्याचे यावेळी अधिकाऱ्यांनी सांगितले.