16160

कास येथील माऊली मंदिरात
विविध कार्यक्रमांचे आयोजन
सकाळ वृत्तसेवा
बांदा, ता. ४ः कास येथील श्रीदेवी माऊली मंदिरात नवरात्रोत्सवानिमित्त विविध धार्मिक व सांस्कृतिक कार्यक्रमांचे आयोजन केले आहे. यानिमित्त दररोज सकाळी देवीची पूजाअर्चा, दुपारी आरती, तीर्थप्रसाद व महाप्रसाद होणार आहे.
यानिमित्त उद्या (ता.५) सायंकाळी ६ वाजता देऊळवाडी महिलांची फुगडी, रात्री ८ वाजता ऋचा संजय पिळणकर (माणगाव) यांचे कीर्तन, रात्री ९ वाजता मुळपुरुष प्रासादिक भजन मंडळ, वेंगुर्ले यांचे वारकरी भजन होणार आहे. रविवारी (ता.६) सकाळी ९ वाजता मोफत आरोग्य शिबीर, सायंकाळी ६ वाजता नवरंग महिला फुगडी ग्रुपचा फुगडी कार्यक्रम, सायंकाळी ७ वाजता संगीत रजनी संध्या हा संगीत कार्यक्रम, रात्री ९ वाजता मातोड पेंडूर येथील वारकरी भजन, रात्री १० वाजता वावळेश्वर दशावतार मंडळाचा नाट्यप्रयोग होणार आहे. सोमवारी (ता.७) सायंकाळी ६ वाजता जय भवानी फुगडी ग्रुप मुंडासबागवाडी यांचा फुगडी कार्यक्रम, रात्री ९ वाजता कलेश्वर दशावतार मंडळाचा नाट्यप्रयोग होईल. मंगळवारी (ता. ८) सायंकाळी ६ वाजता मळीवाडी महिलांची फुगडी, ७:३० वाजता कास ग्रामस्थांचे भजन, रात्री ८ वाजता श्री देव भैरव जोगेश्वरी फुगडी मंडळ कुडाळ यांचा फुगडी कार्यक्रम, रात्री ९ वाजता कथ्थक नृत्य विशारद मृणाल सावंत यांचे नृत्य सादरीकरण होईल. बुधवारी (ता.९) सायंकाळी ६ वाजता काळभैरव महिला फुगडी ग्रुप राणेवाडी यांची फुगडी, ७ वाजता कास ग्रामस्थांचे भजन, रात्री ८ वाजता श्री देव ब्राह्मण प्रसादिक भजन मंडळ रेडी यांचे भजन, रात्री ९ वाजता प्रसिद्ध निवेदक बादल चौधरी यांच्या समवेत ''खेळ पैठणीचा'' हा महिलांसाठी कार्यक्रम होईल. गुरुवारी (ता.१०) सायंकाळी ६ वाजता महालक्ष्मी फुगडी ग्रुप पंडितवाडी यांची फुगडी, सायंकाळी ७ वाजता कास ग्रामस्थांचे भजन, रात्री १० वाजता चेंदवणकर दशावतार मंडळाचा नाट्यप्रयोग होईल. पावणेर उत्सवानिमित्त १४ ला रात्री ९ वाजता जय हनुमान दशावतार नाट्यमंडळ आरोस यांचा दशावतारी नाट्यप्रयोग होईल. भाविकांनी या सोहळ्याचा लाभ घ्यावा, असे आवाहन कास ग्रामस्थांतर्फे केले आहे.